27 апреля 2016 г.
Аттелĕхĕн Аслă вăрçинче Çĕнтерÿ тунăранпа 71 çул çитнине хатĕрленсе ирттерсе ярас тĕлĕшпе туса хунă районти оргкомитетăн черетлĕ ларăвне унăн председателĕ - район администрацийĕн пуçлăхĕн пĕрремĕш çумĕ Леонард Левый ертсе пынă.
Ларура уява ирттерме палăртнă мероприятисемпе райадминистрацин культура тата информаципе тивĕçтерекен пайĕн начальникĕ Антонина Александрова, Елчĕкри вăтам шкул директорĕ Лариса Васильева, халăха социаллă пулăшу паракан центр директорĕ Галина Лаврова, Елчĕкри культура çурчĕн директорĕ Валентина Портнова тата ыттисем паллаштарнă.
Аслă Çĕнтерÿ уявне çу уйăхĕн 8-9-мĕшĕсенче паллă тăваççĕ. Малтанхи кун ăна ялсенче ирттереççĕ. Уявăн тĕп мероприятийĕ майăн 9-мĕшĕнче Елчĕкри тĕп лапамра 10 сехетре пуçланать.
Уява хатĕрленес ĕçсем пуçланнă ĕнтĕ. Ялсенче палăксен территорисенче пĕчĕк юсав ĕçĕсем пыраççĕ, тирпей-илем кĕртеççĕ. Курнавăшра тата Çĕнĕ Эйпеçре Аслă Çĕнтерÿ кунне уявланă кунсенче çĕнĕ палăксем уçаççĕ. Вĕсене пĕтĕмпех ял çыннисен укçи-тенкипе тунă. Пуçаруçисем те ялта пурăнакансем. Аслă Елчĕкре палăка юсама Вадим Чернов предприниматель пулăшать. Ятарласа йĕркеленĕ комисси уяв умĕн ялсенчи палăксене мĕнле хатĕрлесе çитернине тĕрĕслесе тухать.
Йĕркелÿ комитечĕн председателĕ Леонард Левый ларура уяв мероприятийĕсене ирттерсе яма пурин те яваплăха туйса ĕçлемеллине, пуçарулăх кăтартмаллине палăртрĕ.
Çакна та аса илтерер: паянхи кун районта Аслă вăрçă участникĕсем 24. Вĕсенчен çуррине яхăн район центрĕнче иртекен Çĕнтерÿ уявне хутшăнма шутлать.