27 апреля 2016 г.
2016 çулхи апрелĕн 26-мĕшĕнче Чернобыль атом электростанцийĕнче инкек пулнăранпа 30 çул çитрĕ. Раççейре 1993 çултанпа çак куна радиаци инкекĕсенче тата синкерлĕхĕнче вилнĕ çынсене асăнмалли кун тесе палăртнă. 2003 çулта Пĕрлешнĕ Нацисен организацийĕ апрелĕн 26-мĕшĕнче Радиаци инкекĕсенче тата синкерлĕхĕнче вилнисене асăнмалли пĕтĕм тĕнчери кун тесе пĕлтернĕ.
30 çул каялла, 1986 çулхи апрелĕн 26-мĕшĕнче, Чернобыль атом электростанцийĕн тăваттăмĕш энергоблокĕ сирпĕннĕ. Реактор юрăхсăра тухнине-арканнине пула сывлăшри радиактивлă веществосем Европăпа Совет Союзĕн пысăк пайне сиенленĕ. Взрыв вăхăтĕнче пĕр çын вилнĕ, тепри каярахпа пурнăçран уйрăлнă. Çапах та радиаци çынсене шеллемест: Чернобыльти АЭС сотрудникĕсенчен тата çăлав командин 134 çыннин радиаци чирĕ пулнине палăртнă, вĕсенчен 34-шĕ вилнĕ.
Чернобыльти АЭСри пушара Чернобыль тата Припять хулисенчи, Киевран, çывăхри облаçсенчен килнĕ пушар хурал чаçĕсенчен пушарнăйсем сÿнтерме хутшăннă. Авари юлашкине пĕтерме чылай ведомствăсенчи сотрудниксем хутшăннă. АЭС çывăхĕнчи 30 çухрăмлă зонăра специалистсемпе çар служащийĕсем ĕçленĕ. Вĕсене каярахпа «ликвидаторсем» тенĕ. Сменăпа ĕçленĕ май, авари юлашкисене пĕтерме пĕтĕмпе 600 пине яхăн çын хутшăннă. Малтанхи вăхăтра радиацине чакарас, унăн сиенне пĕтерес енĕпе тăрăшнă. Çапах та иккĕмĕш взрыв кĕрленĕ. Ун хыççăн территорие тасатас, çавăн пекех «саркофаг» /тăваттăмĕш энергоблока хуплакан бетонран хатĕрленĕ сооружени/ тăвассипе ĕçсем пуçланнă.
Чернобыль АЭСĕнчи инкеке пĕтерме Чăваш Енрен 2 пине яхăн çын хутшăннă. Хальхи вăхăтра вĕсене паракан çăмăллăхсене 1098, çав шутран пирĕн районта 7 çын илсе тăраççĕ. Вĕсене апат-çимĕç туянма уйăхсерен, сывлăхне çирĕплетме çулсерен укçа-тенкĕ уйăраççĕ.
Н.НИКОЛАЕВА,
районти халăха социаллă пулăшу паракан пайĕн ертÿçин çумĕ.