23 апреля 2016 г.
Майăн 9-мĕшĕнче чи чаплă та çутă уява - Аслă Çĕнтерÿ кунне паллă тума хатĕрленетпĕр. Ăна кăçал хатĕрленсе ирттересси пирки калаçу пуçартăмăр та Чăваш Республикин ĕçлев тата социаллă хÿтлĕх министрĕн çумĕпе Елена Владимировна Сапаркинăпа:
- Пĕтĕм тĕнчери тăнăç пурнăçа килĕштерекенсем Аслă Çĕнтерÿ кунне яланах чаплă уявлаççĕ. Чăннипех, çурхи ăшă та çутă кунсенчен пĕри вăл. 1941-1945 çулсенчи Аттелĕхĕн Аслă вăрçинчи çĕнтерÿ тĕнчене фашизмран хăтарчĕ, малашлăх аталану çулне уçса пачĕ. Кăçал та уява ăнăçлă ирттерсе ярассишĕн тĕрлĕ мероприяти йĕркелеме палăртаççĕ.
- Елена Владимировна, Аттелĕхĕн Аслă вăрçин ветеранĕсен йышĕ çулсерен чакса пырать. Хальхи вăхăтра çак енĕпе лару-тăру мĕнлерех-ши?
- Хальхи вăхăтра республикăра Аттелĕхĕн Аслă вăрçин 1250 инваличĕпе участникĕ, 5 пине яхăн салтак арăмĕ, 18,6 пин тыл ветеранĕ пурăнаççĕ. Елчĕк районĕнче паянхи кун тĕлне Аслă вăрçăн 24 инваличĕпе участникĕ, вилнĕ салтаксен 132 тăлăх арăмĕ, 678 тыл ветеранĕ çеç сывă. Мĕн тăвăн, вăхăт малалла шунă май, паттăрсем те пурнăçран уйрăлсах пыраççĕ.
- Ветерансене мĕнле чыслĕç?
- Ветерансене чыслама кăçал республика бюджетĕнче 731,2 пин тенкĕ пăхса хăварнă, çавăн пекех предприятисемпе организацисенчен, уйрăм предпринимательсенчен те пулăшу кĕтетпĕр.
Аслă Çĕнтерÿ кунĕ тĕлне ăна çывхартма пулăшнă ветерансем патне Раççей Президенчĕн Владимир Путинăн, Чăваш Республикин Пуçлăхĕн Михаил Игнатьевăн Тав çырăвĕсене çитерĕç. Çавăн пекех Аттелĕхĕн Аслă вăрçин участникĕсемпе инваличĕсем парнесем илĕç, Аслă Çĕнтерĕве халалланă мероприятисене хутшăнĕç.
Пирĕн тĕп тĕллев - вăрçă ветеранĕсемпе тыл ĕçченĕсене çитĕнекен ăрăва патриотла воспитани пама явăçтарасси.
- Çапах та, уявсем вăхăтĕнче мĕнле мероприятисем ирттерме палăртаççĕ?
- Вĕсем тĕрлĕрен. Хальхи вăхăтра гражданла-патриотлă «Ăрусен астăвăмĕн эстафети», «Çĕнтерĕве салют» акцисем, патриотла сăвăсен «Çĕр çинчи тăнăç пурнăçшăн» конкурсĕ пырать.
Апрель уйăхĕн вĕçĕнчен пуçласа вĕренÿ организациĕсенче Аслă Çĕнтерĕве халалланă тематика каçĕсем, класс сехечĕсем, савăнăçлă концертсем иртеççĕ.
Йăлана кĕнĕ тăрăх, Аттелĕхĕн Аслă вăрçин участникĕсемпе, тыл ĕçченĕсемпе тĕлпулусем те иртĕç. Пĕтĕм Раççейри «Çĕнтерÿ волонтерĕсем» общество юхăмĕ патриотла юрăсен конкурсне, ветерансене уйрăммăн саламлассине, пулăшассине йĕркелени те пысăк пулăм.
Республикăра, районта иртекен «Çĕнтерÿ йывăçĕ», «Георги ленти», «Çĕнтерÿ çырăвĕ», «Çĕнтерÿ вальсĕ», «Асăну вахти» акцисем, «Çĕнтерÿ кунĕ» флешмоб, «Берлина» историллĕ квест та çамрăксен пурнăçĕнче паллă вырăн йышăнмалла.
«Вилĕмсĕр полк», «Салтак пăтти», «Халăх çĕнтерĕвĕ», «Пурне те пĕр ятран аса илер» тата ытти вун-вун акци патриотла воспитани парассинче тĕп вырăнта пулĕ.
- Аслă Çĕнтерÿ уявĕ умĕн палăксемпе обелисксене, Асăну хăмисене те йĕркене кĕртмелле...
- Кунта шкулсенче вĕренекенсем çеç мар, кашни çын тимлемелле. Елчĕк тăрăхĕнче ку енĕпе çулсеренех сахал мар ĕç пурнăçлаççĕ: палăксене, обелисксене çĕнетеççĕ, Асăну хăмисене йĕркене кĕртеççĕ. Кăçал та районта çĕнĕлĕхсем пур: Çĕнĕ Эйпеçре, Курнавăшра Аттелĕхĕн Аслă вăрçинче вилнисене асăнса çĕнĕ палăксем уçма палăртнă. Çакă, паллах, вăрçă паттăрĕсене чăннипех хисепленине палăртать.
Аттелĕхĕн Аслă вăрçин ветеранĕсен пурнăç условийĕсене тĕпчесси те малалла пырать. Кăçал çеç районти 3 ветерана çурт-йĕр условийĕсене лайăхлатма сертификат панă. Тепĕр 4 ветеран ăна çывăх вăхăтра илĕ.
А.КАРЛИН калаçнă.