23 апреля 2016 г.
Çĕр типсе пынă май пур çĕрте те хĕл каçа пуçтарăннă тасамарлăха пуçтаратпăр, хытхурана, типĕ курăка тасататпăр.
Раççей Федерацийĕнчи пушара хирĕçле режимăн правилисене улшăнусем кĕртнĕ. Вĕсемпе килĕшÿллĕн ялхуçалăх пĕлтерĕшлĕ тата запас çĕрсем çинче типĕ ÿсен-тăрансене харпăр хăй тĕллĕн çунтарма, уйсенче кăвайт чĕртме чарнă. Çавăн пекех автомобиль тата чукун çул тăрăхĕсенче типĕ курăка тата çунакан япаласене вут тивертме юрамасть.
Типĕ курăка тивертсе çунтарнăшăн халĕ РФ Административлă кодексĕн 20.4 статйипе явап тытма тивет. Ку вăл граждансемшĕн - асăрхаттарни е 1000 тенкĕрен пуçласа 1500 тенкĕ таран административлă штраф хуни, должноçри çынсене - 6000 тенкĕрен пуçласа 15000, юридика сăпатне - 15000 тенкĕрен 200000 тенкĕ таран штраф.
Пушара хирĕçле уйрăм условисенче пушар хăрушсăрлăхĕн правилисене пăснăшăн граждансене 2000-рен 4000 тенкĕ, должноçри çынсене - 15000-рен 30000, юридика сăпатне 400000-рен пуçласа 500000 тенкĕ таран административлă штраф пама пултараççĕ.
Раççейре çуллен вăрмансенче 20-30 пин пушар тухать, 2-3 млн гектар вăрман çунать. 10 пушартан 8-шĕ çынсем вăрмансенче тата вĕсен çумĕнчи ялхуçалăх çĕрĕсем çинчи типĕ ÿсен-тăрана вут чĕртнипе тухать.
Енчен те эсир вăрманта е ун çывăхĕнчи çĕрсем çинче пушар асăрхарăр пулсан, çийĕнчех 8-800-100-94-00 номерпе шăнкăравласа пĕлтерме васкăр. Сирĕн шăнкăрава вăрман хуçалăхĕн регионти диспетчерĕ тытĕ, çийĕнчех тивĕçлĕ мерăсем йышăнма тăрăшĕç.
Тепĕр хут аса илтеретпĕр: кил-çурт таврашĕнче те, вăрман çывăхĕнче те типĕ курăка ан çунтарăр.
С.САРДАЕВ,
пушар асăрхавĕн районти инспекцийĕн аслă инспекторĕ.