23 апреля 2016 г.
Виçĕмкун Вырăнти хăйтытăмлăх кунне паллă турăмăр. Çав уява йĕркелесси çинчен Указа Раççей Президенчĕ Владимир Путин 2012 çулта алă пуснă.
Чăваш Енре вырăнти хăйтытăмлăх мĕнле аталанса пыни çинчен «Единая Россия» политика партийĕн регионти уйрăмĕн секретарĕ, ЧР Патшалăх Канашĕн патшалăх строительстви, вырăнти хăйтытăмлăх, регламент тата депутат этики енĕпе ĕçлекен комитет председателĕ Николай Малов каласа парать:
- Республика ертÿлĕхĕ, «Единая Россия» политика партийĕ хуласемпе районсен, хуласемпе ял тăрăхĕсен аталанăвне нихăçан та хăйхальлĕнлĕхе яман. Чăваш Ен экономикине аталантарса, эпир пĕр вăхăтрах эффективлă социаллă политикăна тытса пыратпăр. Вăл вара вырăнти социаллă инфратытăма аталантарнипе пурнăçланать.
Республикăри хальхи шайри 100 акушерпа фельдшер пункчĕ туса лартма шантартăмăр - эпир ăна турăмăр. Малаллахи çулсенче тепĕр 50 ФАП тăватпăр.
Кашни район центрĕнче физкультурăпа сывлăха çирĕплетекен комплекссем, Шупашкарта вара хальхи йышши Пăр керменĕ туса лартрăмăр. Нумай регионта çакăн йышши объектсем пирки ĕмĕтленеççĕ кăна-ха.
Эпир ялти шкулсенчи 69 спорт залне тĕпрен юсарăмăр. Тата 24 спортзала çĕнететпĕр.
Хальхи йышши 50 ача сачĕ туса лартрăмăр, çапла майпа «Единая Россия» политика партийĕн «Ача сачĕсем - ачасене» проект пурнăçланчĕ. Халĕ эпир «Единая Россия» политика партийĕн çĕнĕ шкулсем тумалли федерацин çĕнĕ программине пурнăçа кĕртетпĕр. Республикăра çитес 10 çулта 30 ытла çĕнĕ шкул ачасене йышăнĕ. Çаксем пĕтĕмпех Чăваш Республикинче пурăнакансен интересĕсемшĕн «Единая Россия» партин команди пĕрле ĕçленипе пулнă.
Ялта çул-йĕр тăвасси вырăнти влаçăн ĕçĕ-ха, анчах ял тăрăхĕсен хĕсĕк бюджечĕпе вĕсем çак тĕллеве пурнăçлаймасса эпир лайăх ăнланатпăр. Ял тăрăхĕсен пурнăçĕпе ĕçĕ-хĕлне лайăхлатакан, социаллă инфратытăм объекчĕсем патне илсе пыракан çул-йĕр вара кирлех. Çак тĕллевпе 2015 çултан вара ялсен урамĕсене вакă чул сарса хытарнă çулсем тăвас ĕçе пуçăннă. Пĕлтĕр çакнашкал çулсене 21 ялта 13,3 çухрăм сарнă. Анчах çакă çителĕксĕр, йĕркеллĕ çулсем кашни ялтах пулмалла. Çавна май, 2015 çулта пуçланă программăна малалла тăсса, кăçал пурте усă куракан, вак чул сарнă автомобиль çулĕсене 99 ялта пĕтĕмпе 49,9 çухрăм тăршшĕ ĕçе кĕртмелле. 2016-2021 çулсенче ялсенче 200 çухрăмран кая мар автомобиль çулĕсем тумалла.
Муниципалитет аталанăвĕ, вырăнти хăйтытăмлăх çинчен калакан законодательствăна лайăхлатас ыйтусем çине республика ертÿçисем, Чăваш Ен парламенчĕ ялан пысăк тимлĕх уйăраççĕ. Патшалăх Канашĕнчи пирĕн профильлĕ комитет та пысăк ĕç туса ирттерет. Сăмахран, 2015 çулхи декабрь уйăхĕнче комитет членĕсем, «Федерацин тата регионти вырăнти хăйтытăмлăх çинчен калакан законодательствăна улшăнусем кĕртесси çинчен» темăпа ирттернĕ «Çавра сĕтел хушшинче» ĕçне активлă хутшăнчĕç. Унăн итогĕсемпе йышăнусем тунă, тивĕçлĕ органсене сĕнÿсем тăратнă.
Апрелĕн 15-мĕшĕнче Саратовра «Единая Россия» партин «Раççейĕн паянхи ялĕ» тематика форумĕ иртрĕ. Унта эпĕ тата Шупашкар хулин пуçлăхĕ, Чăваш Республикинчи муниципалитет пĕрлешĕвĕсен канашĕн председателĕ Леонид Черкесов хутшăнтăмăр. Форума 2 пине яхăн делегат пухăнчĕ - партин пуçламăш, вырăнти тата регионсенчи уйрăмĕсен представителĕсем, аграрисем, ученăйсем, экспертсем, общество организацийĕсен представителĕсем, чиновниксем. Унта агропромышленноç комплексĕн аталанăвĕн çул-йĕрĕпе, ялти халăха ĕçпе тивĕçтерессипе, сывлăх сыхлавĕпе, вĕренÿпе тата социаллă хÿтлĕхпе çыхăннă ыйтусене, çавăн пекех ялти журналистикăн ял аталанăвĕнчи пĕлтерĕшне сÿтсе яврĕç. Апат-çимĕçпе çыхăннă хăрушсăрлăх та тĕп темăсенчен пĕри пулчĕ.
Форумăн пĕтĕмлетÿллĕ пĕрлехи ларăвĕнче «Единая Россия» партин Председателĕ Дмитрий Медведев тухса калаçрĕ. Вăл партишĕн аграрлă политика яланах чи пĕлтерĕшлĕ ыйтусенчен пĕри пулнине палăртрĕ. Ялти кулленхи пурнăç йĕркеллĕ, хăтлăх енĕпе вăл хула условийĕсемпе танлашмалла пултăр тесе пĕтĕмпех тăваççĕ.
Çакна та палăртмалла: ку енĕпе Чăваш Ен Раççейри ытти регионсенчен малта тăрать. Пирĕн республикăра пирвайхи медицина пулăшăвĕ парас, фельдшерпа акушер пункчĕсем тăвас опыта Раççей шайĕнче сараççĕ.
Юлашкинчен Чăваш Енре пурăнакансене виçĕмкун пулнă Вырăнти хăйтытăмлăх кунĕпе саламлатăп, çирĕп сывлăх, тăнăçлăх сунатăп. Çавăнпа пĕрлех тăван яла ертсе пырас ĕçе хутшăнма активлăх кăтартма кирлине тепĕр хут аса илтерес килет.