23 апреля 2016 г.
Шупашкарти Чăваш патшалăх филармонинче муниципалитет ĕçченĕсен професси уявне - Вырăнти хăйтытăмлăх кунне халалласа савăнăçлă лару иртнĕ.
Елчĕк районĕнчен кайнă делегаци йышĕнче, ăна район администрацийĕн пуçлăхĕ Николай Миллин ертсе пынă, район администрацийĕн ĕçченĕсем, ял тăрăхĕсен ертÿçисем, ялсен старостисем, ветерансем пулнă.
Чăваш Республикин Пуçлăхĕ Михаил Игнатьев вырăнти хăйтытăмлăх ĕçченĕсене уяв ячĕпе саламланă, патшалăх наградисемпе чысланă.
Маларах районта та уява паллă тунă. Савăнăçлă ларура район администрацийĕн пуçлăхĕ Николай Миллин вырăнти хăйтытăмлăх органĕсенче ăнăçлă ĕçленĕшĕн район администрацийĕн экономика, пурлăх тата çĕр хутшăнăвĕсен пайĕн ертсе пыракан эксперт специалистне Ирина Никоновăна, финанс пайĕн тĕп эксперт специалистне Наталия Черновăна, Аслă Таяпа ял тăрăхĕн пуçлăхĕн çумне Нелли Ивановăна район администрацийĕн Хисеп грамотисене панă.
Елчĕк районĕ республикăри муниципалитетсем хушшинче ăнăçлă аталанса пыракансен йышĕнче. 2012 çулта Чăваш Республикинчи вырăнти хăйтытăмлăх органĕсен ĕç-хĕлĕнчи кăтартусемшĕн район виççĕмĕш вырăн йышăннă.
Районта 9 ял тăрăхĕ. Вĕсем те ăнăçлă аталанаççĕ. Чăваш республикинчи ял /хула/ тăрăхĕсен экономика ăмăртăвĕнче Елчĕк ял тăрăхĕ 2012 çулта пĕрремĕш вырăн йышăннă. Курнавăш тата Аслă Пăла Тимеш ял тăрăхĕсем те малтисен йышне кĕнĕ.
Ялсенче тирпей-илем кĕртес енĕпе ăнăçлă ĕçлеççĕ. Çавăн пекех районта автомобиль çулĕсене юсаса çĕнетессипе, ялсен урамĕсене хытă сийлĕ çулпа çыхăнтарассипе ĕçсем ăнăçлă пыраççĕ.
Ял тăрăхĕсем çынсен пурнăç пахалăхне лайăхлатассине тĕп тĕллев тесе палăртаççĕ.