20 апреля 2016 г.
Шăматкун Чăваш Республикин Пуçлăхĕ Михаил Игнатьев Елчĕк районĕнче ĕçлĕ çÿревпе пулнă. Ăна район пуçлăхĕ Петр Скворцов, район администрацийĕн пуçлăхĕ Николай Миллин кĕтсе илнĕ.
Республика Пуçлăхĕ Михаил Игнатьев чи малтанах «Победа» ОООра çуракин пирвайхи тапхăрĕпе паллашрĕ. «Победа» ООО ертÿçи Николай Головин çуракине мĕнле хатĕрленни, çĕр ĕçĕнче çĕнĕ техникăпа усă курни çинчен каласа пачĕ. Ĕç вырăнĕнчи канашлăва районти ял тăрăхĕсен, ялхуçалăх предприятийĕсемпе организацисен, хресчен /фермер/ хуçалăхĕсен ертÿçисем те хутшăнчĕç. «Победа» ООО районта, республикăра çĕр ĕç культурисем, выльăх-чĕрлĕх продукчĕсем туса илессипе малта пырать. Çĕнĕ техника нумай туянать. Уй-хир ĕçĕсене кунта вăхăтра пурнăçласа пыма хăнăхнă. Çак кун Анатолий Алексеев механизатор хăйĕн сÿре агрегатне уя ирех илсе тухнă. 100 гектар йышăнакан нумай çул ÿсекен курăксене минераллă удобренипе апатлантараççĕ. Ун хыççăн 18 метр сарлакăш лаптăка ĕçлесе хатĕрлекен сÿре агрегатне кăкарнă К-700 трактор нÿрĕк тытать. Агрегатăн ĕç тухăçлăхĕ пысăк. Хамăр çĕршывра туса кăларнă К-700 çĕнĕ тракторсем районта халĕ пиллĕк. Кĕçех тепри хутшăнмалла. Çакă ют çĕршывсенче туса кăларакан техникăна хамăр çĕршывра ăсталанисем улăштарса пынин палли. К-700 трактор çумне культиватор, сеялкăсем кăкарса ĕçлеме те пулать.
Ялхуçалăх пайĕн начальникĕ Петр Тремасов район çуракине мĕнле кĕтсе илни çинчен каласа пачĕ. Районта 39723 гектар çинче ялхуçалăх культурисем туса илеççĕ. Çав шутран кĕрхи культурăсемпе нумай çул ÿсекен культурăсем усă куракан лаптăкăн 40 процентне йышăнаççĕ. Кĕрхи культурăсен лаптăкĕ 6250 гектар шутланать. Çакă паха - кăçалхи хĕл тем тĕрлĕ улшăнса тăчĕ пулин те кĕрхисем лайăх хĕл каçнă. Çурхи культурăсене 23712 гектар çинче акса тата лартса хăвармалла. Çав шутран пĕрчĕллĕ тата пăрçа йышши культурăсем 15000 гектар йышăнаççĕ. Элита вăрлăхсемпе усă курасси кăçал тата ÿснĕ. Çунтармалли-сĕрмелли материалсем çураки ирттерме çитеççĕ кăна мар, теприсем ăна вырма валли те саппасласа хунă.
Республика Пуçлăхĕ районта çурхи ĕçсем лайăх пуçланнине палăртрĕ те, ăна миçе кунта вĕçлессипе интересленчĕ. Лайăх кунсем тăрсан пĕрчĕллĕ культурăсене акассине майăн 1-мĕшĕ тĕлне вĕçлеме майсем пур иккен. Республика Пуçлăхне Михаил Игнатьева кăçал район мĕн чухлĕ тырă туса илесси те кăсăклантарчĕ. Гектар тухăçне ÿстерсе пырса ăна пĕлтĕрхинчен ытларах туса илме шутлаççĕ районта.
Исемпел ялĕнчен тухсан кĕрхи культурăсен симĕс калчи куçа илĕртет. Республика Пуçлăхĕ «Комбайн» ЯХПК çĕрĕ çинче чарăнса илмесĕр чăтаймарĕ. Чăнах та, калча пĕр тикĕс ешерет, пысăк тухăç пама шантарать.
«Прогресс» акционерсен хупă обществинче те Кавал - Елчĕк çулĕн сылтăм енче кĕрхи культурăсене минераллă удобренипе апатлантараççĕ. Акционерсем удобрени сапакан агрегата вырăнта ăсталанă. Сарлака урапаллăскер вăл çĕре ытлашши пусăрăнтармасть, хытармасть. Çакна асăрхамасăр хăвармарĕ Михаил Игнатьев. Михаил Васильевич хуçалăх ертÿçинчен Петр Скворцовран акционерсен обществин ĕçĕ-хĕлĕпе интересленчĕ. Хуçалăхра ÿсен-тăран отраслĕ лайăх аталанни, çапах та сĕт, аш-какай туса илесси пĕтĕм тупăшăн иккĕ-виççĕмĕш пайне йышăннине палăртрĕ Петр Арсеньевич.
Район администрацийĕнче республика Пуçлăхĕ Михаил Игнатьев район пуçлăхĕпе - депутатсен районти Пухăвĕн председателĕпе Петр Скворцовпа тата район администрацийĕн пуçлăхĕпе Николай Миллинпа ĕçлĕ тĕлпулу ирттерчĕ. Республика Пуçлăхĕ район ĕçченĕсене уй-хир ĕçĕсене пысăк пахалăхпа хатĕрленĕшĕн тав турĕ. Районта пушă выртакан çĕрсем çуккине палăртрĕ. «Кăçал Елчĕк районĕ 50 пин тонна пĕрчĕллĕ тата пăрçа йышши культурăсем пухса илессе шанатăп», - терĕ.
Выльăх-чĕрлĕх ĕрчетессинче те ÿсĕмсем лайăх. Ĕне выльăх йышĕ 2015 çулта 200 пуç ÿснине, кăçал 100 пуç хутшăнмаллине пĕлтерчĕ район администрацийĕн пуçлăхĕ Николай Миллин.
Михаил Игнатьев социаллă ыйтусене те хускатрĕ, район центрĕнчи тĕп лапампа паллашрĕ, ял çыннисемпе курнăçса калаçрĕ. Ĕç ветеранне, выльăх-чĕрлĕх ĕрчетес ĕçре 40 çул вăй хунă Гульсиня Галимовăна Чăваш Ен гербне ÿкернĕ асăнмалăх сехет парнелерĕ.
Н.АЛЕКСЕЕВ.