20 апреля 2016 г.
Районта Елчĕкри пушар хуралне йĕркеленĕренпе 55 çул çитнине анлăн паллă тунă.
Тĕп лапамра пушар техникин выставкине йĕркеленĕ. Паянхи пысăк та хăватлă техникăран пуçласа лаша урапи çинчи пичке таранах курма пулчĕ унта. Хăнасемпе пушарнăйсем, пушар хуралĕн ветеранĕсем Елчĕкри культура çурчĕн фойинче пушара, ытти чрезвычайлă лару-тăрăва хирĕç кĕрешекенсен ĕçĕ-хĕлĕпе, çамрăк пушар дружинисен хушшинче йĕркеленĕ конкурссен ÿкĕрчĕкĕсемпе интересленсе паллашрĕç. Библиотекарьсем те уяв тĕлне ятарлă кĕнекесен выставкине хатĕрленĕ. 44-мĕш номерлĕ пушар чаçĕ умĕнчи вут-çулăмпа кĕрешекен ентешсене халалланă палăк умне чечексем хунă.
Культура çуртне халăх йышлă пухăннă. Хăнасемпе ветерансем, хальхи вăхăтра çак канăçсăр ĕçре тăрăшакансем, ял тăрăхĕсен пуçлăхĕсем, шкул ачисем чи малтанах «Елчĕкри пушар чаçне – 55 çул» фильмпа паллашрĕç. Калас пулать, кăçал Раççейре Кино çулталăкĕ иртнĕрен çак фильм хăйне майлă историллĕ йĕр хăварĕ. Пушарнăйсемпе çăлавçăсен ĕçне курса ларнă май ÿт-пÿ тăрăх сивĕ чупа-чупа иртрĕ.
Елчĕксене уяв ячĕпе Раççейри МЧСăн Чăваш Республикинчи Тĕп управленийĕн начальникĕ Станислав Антонов генерал-майор, Чăваш Республикинчи гражданла оборона тата чрезвычайлă лару-тăру енĕпе ĕçлекен патшалăх комитечĕн председателĕн çумĕ Олег Павлов, Чăваш Республикинчи пушара хирĕç кĕрешекен службăн начальникĕ Валерий Игнатьев, Чăваш Республикин шыравпа çăлав службин начальникĕ Николай Глухов, район пуçлăхĕ Петр Скворцов, район администрацийĕн пуçлăхĕ Николай Миллин саламларĕç, пысăк тăрăшулăхпа, хастарлăхпа палăрнă ветерансене Хисеп грамотисемпе, Тав хучĕсемпе чысларĕç. «Маршал Василий Чуйков» медале В.Иванов, Д.Кучков, И.Павлов ветерансем, В.Кузьмин, Н.Смирнов водительсем тивĕçрĕç. Çак кун çын пурнăçĕшĕн, пурлăха сыхласа хăварассишĕн тăрăшакан кашни ĕçченех тĕрлĕ шайри Хисеп хучĕсене, Тав çырăвĕсене пачĕç. Кашнине ятран аса илсе те пĕтерес çук. Çавăн пекех чылайăшĕн кăкăрĕсем çинче юбилей медалĕ - «Елчĕк районĕнчи пушар хуралне 55 çул» хутшăнчĕ.
Станислав Антонов генерал-майор маларах асăннă фильма пăлханмасăр пăхайманнине, Елчĕк подразделенийĕн ĕçĕпе кăмăллине палăртса хăварчĕ. Елчĕкри 44-мĕш пушар чаçне Василий Григорьев ертсе пыма пуçланăранпа коллективра ĕç условийĕсене лайăхлатнă, ырă улшăнусем тунă. Ял çыннисене, вĕренекенсене пушар хăрушсăрлăх правилисене ăнлантарса килрен-киле, шкулсене çÿрессине йĕркеленĕ. Василий Николаевич пуçтарăннисене пушар чаçĕн историйĕпе паллаштарчĕ.
Хальхи вăхăтра коллективра 19 çын тăрăшать. Инкек-синкек сиксе тухсан /Турă сыхлатăрах/ 5 техника çула тухма хатĕр тăрать. Районта ирĕклĕ пушар дружини 13 йĕркеленĕ, вĕсене 11 мотопомпăпа тивĕçтернĕ. Курнавăшра, Тăрăмра, Кĕçĕн Таяпара, Патреккелте пушар машинисем яланах стройра.
Уява ăшă сăмахсем, парнесем, юрă-ташă илем кÿреççĕ. Шупашкартан килнĕ хăнасем пушар чаçне тĕрлĕ тĕслĕ кăларакан принтер, картина парнелерĕç.
Кунтах районти шкул ачисем хушшинче пушара хирĕç кĕрешсе йĕркеленĕ конкурссене пĕтĕмлетрĕç. Çĕнтерÿçĕсем - Д.Патшина /Елчĕкри искусство шкулĕ/, В.Павлова /Çĕнĕ Пăва/, И.Гущинăпа А.Журавлев /Таяпа Энтри/, Т.Пушков /Елчĕк/, Д.Можаев /Патреккел/. Вĕсене пушар асăрхавĕн районти инспекцийĕн ертÿçи А.Сайкин, ВДПОн районти начальникĕ О.Патшина хаклă парнесем парса савăнтарчĕç.
Пушарнăйсемпе çăлавçăсене Елчĕк шкулĕнче вĕренекенсем, культура ĕçченĕсем, «Туслăх» фольклор ансамблĕ илемлĕ юрăсемпе саламларĕç. РФ тата ЧР культурăн тава тивĕçлĕ ĕçченĕ Геннадий Борисов та уявран пăрăнса юлман. Вăл вăхăтĕнче районти пушар чаçĕнче хор йĕркеленĕ, унпа республикăри конкурсра пĕрре мар палăрнă. Хальхинче Геннадий Арсентьевич уява пуçтарăннисене хăйĕн иксĕлми пултарулăхĕпе тыткăнларĕ. Ветерансем сумлă уяв кĕрекинче ĕлĕкхине аса илчĕç, ертÿçĕсене хăйсене манманшăн тав турĕç.
В.СМИРНОВА.
Сăнÿкерчĕкре: пушар техники: лаша урапинчен хăватлă машина таран.