20 апреля 2016 г.
Призерсен йышĕнче
Елчĕкри пĕтĕмĕшле пĕлÿ паракан вăтам шкулта вунпĕрмĕш класра вĕренекен Даниил Кондратьев физкультура предмечĕпе Чăваш Республикинче кăçал çĕнтерÿçĕ ятне çĕнсе илчĕ, финалти тапхăра хутшăнма тивĕçрĕ. Ака уйăхĕн 9-15-мĕшĕсенче Ульяновск хулинче 65 регионтан 236 вĕренекен физкультура предмечĕпе чи пултаруллисене палăртрĕç. Даниил та хăйĕн ăсталăхĕпе палăрчĕ. Олимпиадăра тĕрлĕ пилĕк конкурс ирттернĕ: теорипе методика пĕлĕвĕсене хаклани, баскетбол, гимнастика, çăмăл атлетика тата ĕçлевлĕх физкультура /100 тата 3000 метра чупасси, шывра ишесси, пăшалтан пересси тата ытти те/. Пĕтĕм конкурссенче Елчĕк каччи малтисен шутĕнче пулчĕ. Çавăнпа Даниил призерсен йышне кĕме пултарчĕ.
Даниила олимпиадăна хатĕрленĕ В.Демьяновпа Н.Волков физкультура учителĕсем нумай тăрăшнă. Ульяновска кайма çулçÿрев тăкакĕсене саплаштарма Елчĕк ентешлĕхĕн ертÿçи А.Лапшин пулăшнă.
А.КАРЛИН.
«Шкул пики» конкурсра
Шупашкарти трактор тăвакансен керменĕнче «Шкул пики-2016» конкурс иртнĕ.
Унта республикăри 16 вĕренекен хутшăннă. Пирĕн район чысне Курнавăш шкулĕнче 9 класра вĕренекен Татьяна Курчина хÿтĕленĕ. Вăл «Чи хÿхĕм пике» номинаци çĕнтерÿçи пулса тăнă.
«Эпĕ – тĕпчевçĕ»
Кĕçĕн классем хушшинчи тĕпчев ĕçĕсен тата пултарулăх проекчĕсен «Эпĕ - тĕпчевçĕ» республикăри конкурсĕ хыçа юлнă.
3-4 классем хушшинчи «Физика тата техника» енĕпе ирттернĕ конкурсра Елчĕк шкулĕнчи Анастасия Данилова /ертÿçи И.Идутова/ «Сехетсем пурте тĕрлĕрен» ĕçĕпе виççĕмĕш вырăн йышăннă.
Театр тĕнчинче
Драма коллективĕсен «Театр тĕнчинче» районти фестиваль-конкурсне пĕтĕмлетнĕ.
Чăваш, вырăс, тутар спектаклĕсене куракансем ăшшăн йышăннă. «Чи лайăх режиссер ĕçĕ» номинацире Елчĕкри халăх театрĕ /ертÿçи В.Панкратова/, «Чи лайăх артист» ятсене Çĕнĕ Пăвари «Театр тĕнчинче» драма коллективĕнчи В.Доброхотовпа А.Васильева тивĕçнĕ. Аслă Пăла Тимешри «Тарават», Лаш Таяпари «Сунтал», Кĕçĕн Таяпари «Игроки», Çирĕклĕ Шăхалĕнчи «Туслăх», Сăрьелĕнчи «Игрок» драма коллективĕсем те тĕрлĕ номинацисен çĕнтерÿçисем пулса тăнă, дипломсене тивĕçнĕ.