20 апреля 2016 г.
Ĕç çын пурнăçĕнче тĕп вырăн йышăнать. Чуна çывăх ĕçре нумай çул тата туслă коллективра тăрăшма шăпа пÿрни, ĕçтешсен хисепне çĕнсе илме пултарни - чăн-чăн телей. Çак сăмахсене пурĕ 38 çула яхăн ĕç стажĕ пуçтарнă, юлашки 10 çулхи тапхăрта «Прогресс» акционерсен хупă обществинчи профсоюзăн вырăнти комитетне, ревизи комиссине тата хĕрарăмсен канашне ертсе пыракан Ольга Васильевна Крылова çинчен каланăнах туйăнать...
Пĕрле ĕçлекенсем Ольга Васильевна хăйĕн тивĕçне ячĕшĕн анчах мар, тĕплĕн пурнăçланине унăн кашни кунхи тĕслĕхĕнче курса ĕненеççĕ. Хальхи вăхăтра 200 ытла профсоюз членне пĕрлештерсе тăракан вырăнти организацин ĕçĕ-хĕлĕ пĕлтерĕшлĕ. Ĕçе кирлĕ пек йĕркелесе пыма çăмăлах мар пулин те, Ольга Крылова шухăшĕпе, профсоюз пурнăçĕ кăсăклă. Уншăн пушшех çак ĕç çывăх, чун ыйтни, тейĕн. Мĕншĕн тесен вăл малтан та нумай çул АПК ĕçченĕсен профсоюз райкомĕнче тăрăшнă. Çак тытăмра 17 çул вăй хуни - инструктор-ревизор, тĕп бухгалтер тивĕçĕсене пурнăçласа пысăк ăсталăх пухни ăна паянхи ĕçе те çăмăллăнах кирлĕ пек йĕркелесе пыма пулăшать. Ахальтен-и акционерсен обществин администрацийĕпе профсоюзăн вырăнти комитечĕ пĕр-пĕрне ăнланса тата тачă çыхăнса ĕçлеççĕ, çынсене хÿтĕлессипе çыхăннă ыйтусем тавра ĕç çынни майлă тивĕçлĕ килĕшÿсем çирĕплетеççĕ. Петр Арсеньевич Скворцов директор профсоюз организацийĕн ĕçĕпе кăмăллă пулни çинчен палăртса каланине пĕр хутчен анчах мар илтме тÿр килнĕ. Хальхинче те: «Ольга Васильевна пирĕн пысăк коллектива пĕр чăмăра пĕрлештерекен, вăл тăрăшнипе эпир кирек хăш мероприяти те çÿллĕ шайра иртнине курма хăнăхнă ĕнтĕ», - терĕ.
Ялхуçалăх предприятийĕнчи ревизи комиссийĕн председателĕ пулнă май, унăн тĕрлĕ лару-тăрупа тĕл пулма тивет, усал ятлă пулса тăрасси те часах. Мĕншĕн тесен çитменлĕхсем пирки асăрхаттарни никама та килĕшсех каймасть. Айăплă çынсене йĕркене кĕртессинче тата çитменлĕхсене пĕтерессинче çак ăслă хĕрарăм хăйĕн пурнăçĕ тăршшĕпе пухнă ăсталăхĕпе тата вăрттăнлăхĕпе усă курать.
Кашни çынпа тарават кăмăллă, пĕр чĕлхе тупма пĕлекен, вĕсене ырă канаш-сĕнÿ парса пулăшма та тăрăшакан Ольга Васильевнăна сÿрĕк сăн-питлĕ пулнине нихăçан та курман. Унăн уçă чун-чĕрин ăшши пурин валли те çитет. Çавăншăн хисеплеççĕ, юратаççĕ ăна. Унăн юлташĕсем те - хăйĕн пекех ырă шухăш-кăмăллă çынсем.
Профсоюз ĕçĕнче, тĕрĕссипе, пуçаруллă çынсем - чăн-чăн лидерсем анчах пуçа усмасăр нумай çул пикенсе вăй хума пултараççĕ. Ольга Крылова шăпах çак йышри хастар. Кирек хăш ĕçе те иксĕлми вăй-халпа пикенет анчах мар, шанăçа тивĕçлипе тÿрре кăларма та пултарать. Çак çулсенче вăл хутшăннă обществăлла ĕçсене каласа та пĕтерме çук: «Единая Россия» партин районти уйрăмĕн политканашĕн членĕ, политика партийĕн «Прогресс» акционерсен хупă обществинчи тата Акчел ялĕнчи пуçламăш организацийĕн секретарĕ, районти хĕрарăмсен канашĕн членĕ, Акчел ялĕнчи суйлав комиссийĕн председателĕ, АПК ĕçченĕсен профсоюз рескомĕн членĕ... Кил хуçи хĕрарăмĕ, 3 ача амăшĕ, кукамай тата асанне те пулнă Ольга Васильевна мĕнпур ĕçе ĕлкĕрме вăй-хал ăçтан тупать?
- Мĕн çамрăкран тытăнсах хăйсен ĕçне чунтан парăнса пурнăçлакан ертÿçĕсемпе ĕçлеме тÿр килни тата вĕсен шанăçĕ хавхалантарчĕ, ĕçе юратса пурнăçлама хистесе тăчĕ. Пытармастăп, кашни кун ĕçрен хаваслă кăмăл-туйăмпа таврăнатăп, çĕнĕ кун пуçланасса чăтăмсăррăн кĕтетĕп, - терĕ вăл тулли кăмăлтан.
Çемьери тăнăçлăх, чи çывăх çынсен хисепĕпе юратăвĕ те, паллах, Ольга Крыловăна пур ĕçре те пуçаруллă пулма хистет. «Прогресс» акционерсен хупă обществинче гараж заведующийĕнче вăй хуракан, пархатарлă ĕçĕшĕн нумай ят-сума, «Ĕç ветеранĕ» ята тивĕçлĕ пулнă мăшăрĕ, Геннадий Николаевич унăн çăмăл мар ĕçне никамран лайăх ăнланать. Вăл мăшăрне май пур таран пулăшма, хавхалантарма тăрăшать. Çакна курса çитĕннĕ ачисем - Алексей ывăлĕпе Татьяна тата Марина хĕрĕсем амăшĕпе ашшĕн сумлă та пархатарлă ĕçне тивĕçлипе хаклаççĕ, вĕсенчен тĕслĕх илеççĕ. Крыловсен ачисем пурнăç çулĕ çине тăнă ĕнтĕ. Мал ĕмĕтлĕ, виççĕшĕ те аслă пĕлÿ илнĕ, хăйсен пурнăçри вырăнне тупнă. Мария, Анна, Ангелина тата Аделина мăнукĕсем - кил-çурт илемĕ, Ольга Васильевнăпа Геннадий Николаевича савăнтаракансем, вăй хурса ĕçлеме хистекенсем...
Светлана АРХИПОВА.
Автор сăнÿкерчĕкĕ.