16 апреля 2016 г.
Апрелĕн 14-мĕшĕнче Раççей Федерацийĕн Президенчĕ Владимир Путинпа «Тÿрĕ лини» иртрĕ. Ăна 2001 çулхи декабрĕн 14-мĕшĕнчен йĕркелеççĕ. «Тÿрĕ линире» Владимир Путин Раççейре пурăнакансен ыйтăвĕсем çине хуравлать. Кăçал «Тÿрĕ линине» çĕршывăн тĕрлĕ кĕтесĕсенчен тата ют çĕршывсенчен 3 миллион ытла ыйту килнĕ. 3 сехет 40 минут тăсăлнă эфирта Владимир Путин Президент 80 ыйту çине хуравланă.
Чи малтанхи ыйтусенчен пĕри çул-йĕр пахалăхĕ çинчен пулнă. Омск хулинчен панăскер, вăл шăтăк-путăклă çулсем пысăк инкек кÿнине палăртнă. Çĕршыв пуçлăхĕ пĕлтернĕ тăрăх, çак ыйту питĕ çивĕч. Çул-йĕр фондĕнче укçа-тенкĕ сахал мар, анчах вĕсемпе тĕллевсĕр усă кураççĕ. Правительство пухăннă укçа-тенке çĕнĕ çулсем тума тата юсама çеç усă курма мерăсем йышăнмалла, çавăн пекех топливо акцизĕсен çурри те регионсенчи çул-йĕр фончĕсенче юлмалла.
Çынсене хумхантаракан ыйтусенчен ытларах пайĕ экономикăпа çыхăннă. Владимир Путин палăртнă тăрăх, экономикăна аталантарас тесен, çынсен тупăшне ÿстересси пирки шухăшламалла. Çавăнпа правительство пĕчĕк тупăшлă çынсене пулăшу парассипе мерăсем йышăнать. Экономика тытăмне те улăштармалла. Тĕпрен илсен, ку енĕпе ĕçсем пыраççĕ: производство ÿсет, пысăк технологиллĕ продукци шайĕ те пысăкланать. Çавах та малашне çак çул-йĕрĕн витĕмлĕхне ÿстерме кирлине палăртнă Президент.
Экономика санкцийĕсене çывăх вăхăтра илмеççех пулĕ тесе пĕлтернĕ Владимир Путин. Минскри килĕшÿсем Украина айăпĕпе пурнăçланмаççĕ пулин те, Хĕвеланăçĕнче çакна ăнланасшăн мар. «Вĕсем мĕн те пулин шутласа кăлараççех - чарусем тăсăлаççех. Эпир те вĕсен апат-çимĕçĕ пирĕн рынока килессине чарассипе мерăсене тытса тăрăпăр», - тенĕ çĕршыв пуçлăхĕ.
Владимир Путин ют çĕршывсемпе тытакан çыхăнусем çинчен чарăнса тăнă май, лăпкăлăх, çав вăхăтрах çирĕплĕх пирки аса илтернĕ.
«Тÿрĕ линире» Раççейри, тĕнчери экономика, обществăпа политика лару-тăрăвĕпе çыхăннă ыйтусем сахал мар пулнă. Вĕсенчен кашниех пысăк пĕлтерĕшлĕ. Ахальтен мар Владимир Путин Президент тĕрлĕ ыйтăва тĕрлĕ шайра татса парассинче кашниех яваплă пулма кирлине тепĕр хут палăртнă.