Публикации » Николай Малов: «Единая Российăн» вăйлă команда!

16 апреля 2016 г.

“Единая Россия” партин малтанхи сасăлавĕн теми сасăлав кунĕ - майăн 22-мĕшĕ - çывхарса пынă май чи сÿтсе яваканнисенчен пĕри пулса тăчĕ. Ыйтусем вара хальлĕхе нумай-ха. Ĕçĕ çĕнĕлле темелле, пуриншĕн те хăнăхнă япала мар. Çавăнпа эпир “Единая Россия” партин Чăваш Енри регион уйрăмĕн ертÿçине Николай Малова ăнлантарса пама ыйтрăмăр.

- Николай Владимирович, пирĕн вулакансене “Единая Россия” ирттерекен “праймериз” пĕлтерĕшне ăнлантарса параймăр-ши?

- Чи малтанах сире кăштах тÿрлетес тетĕп. “Праймериз” - Америкăри политика сăмахлăхĕнчен илнĕ сăмах. Хăш-пĕр чухне ăна кĕскен çапла калаççĕ, тĕрĕссипе вара процедура “партин малтанхи сасăлавĕ” ятлă. Эпĕ хам вырăс чĕлхине мала хуратăп, ют чĕлхерен кĕнĕ сăмахсене мар.

- Шута илетпĕр. Çапах та унăн пĕлтерĕшĕ мĕнре?

- ”Единая Россия” партин уставĕ ку процеса пĕр ансат тĕллевпе палăртнă: малтанхи тапхăрта плансене тата программăсене кашни конкретлă территорире хамăр çынсемпе пĕрле пăхса тухса тĕрĕслемелле, унтан сасăласа пултаруллă кандидатсенчен чи лайăххисене суйласа илмелле. Çапла майпа эпир темиçе тĕллеве пурнăçлатпăр. Çынсем малтанах кандидатсемпе тата программăсемпе паллашаççĕ. Кандидатсем çитес суйлавсем умĕн хăйне евĕр репетици витĕр тухаççĕ. Парти пĕтĕмлетÿсем туса чи лайăххисенчен лайăххисене суйлама тăратать. Суйласа илесси палăрмаллах çăмăлланать, вăл кандидатсене пĕлсе çитсе, ăнланса пулса иртет. Депутата çакна тивĕçлĕ çынсем кăна тухаççĕ.

- Рударан ылтăн пĕрчисем суйласа илетĕр эппин?

- Сăнарлă каласан, çакăн пек теме те пулать. Çапах та эпĕ çĕнтерÿçĕсенчен сахалрах сасă пухнă кандидатсене пушă порода вырăнне хуман пулăттăм. Ку вăл пирĕн кадрсен резервĕ, идейăсен тата ырă ĕмĕт-шухăшсен çăлкуçĕ. Вĕсем пирĕнпе пĕр шухăшлă çынсем, кĕрешÿри юлташсем. Çапла шутлатăп, партин этикин нормисемпе килĕшÿллĕн результатсене пĕлтернĕ хыççăн пур участник те çĕнтерÿçĕне пулăшма тивĕç. Эпир пурте пĕр ĕçе тăватпăр. Тепĕр ыйту вăл - суйлавçăсен шанăçĕпе кăмăл-туйăмне çĕнсе илесси. Хăшĕ-пĕрисен ку лайăхрах пулать, теприсен тÿрех мар. Анчах эпир - пĕр команда. “Единая Россия” команди.

- Лайăх. Команда пур. Пирĕн, суйлавçăсен, чи лайăххисене суйласа илмелле. Анчах мĕнле танлаштармалла?

- Пĕрремĕшĕнчен, пур кандидат та суйлавçăсемпе тĕл пулусем ирттерĕ, хăйĕн программисене хатĕрлĕ, агитаци материалĕсем кăларĕ. Ку яланхи практика. Иккĕмĕшĕнчен, вĕсем пурте обязательнăй йĕркепе икĕ хутран кая мар халăхпа сÿтсе явассине хутшăнмалла. Сÿтсе явнисене телевиденипе, интернетăн социаллă сечĕсенче кăтартаççĕ. Вĕсене кайран та пăхма пулать, çырса илнине Youtube сайчĕ çине кĕртеççĕ. Процедура çав тери уçă, тÿрĕ те таса. Информацирен татăк пулмастăр.

- ”Яланхи” суйлавсемпе танлаштарсан уйрăмлăх мĕнре?

- Пĕрремĕш тата чи кирли: суйлавра тĕрлĕ политика вăйĕсем тупăшаççĕ, кунта вара эсир пĕр “Единая Россия” парти картинче суйласа илетĕр. Ыттисем техника енлĕ уйрăмлăхсем.

- Вĕсем çинчен калаçăпăр та. Камсем сасăлаççĕ?

- Чăваш Енре пурăнакансем - 18 çултан пуçласа тата аслăраххисем.

- Ăçта сасăлаççĕ?

- Сасăламалли шутлав участокĕсенче. Уйрăмлăхĕ çавă çеç: ĕçлекен суйлав участокĕсен 20 процентне кăна явăçтаратпăр. Республикипе пурĕ 236 пулать. Сирĕн сасăлав участокĕ ăçта вырнаçнине Партин вырăнти уйрăмĕсен ĕç тăвакан комитечĕсенче тата интернетра пирĕн сайт çинче http://chuvash.ru пĕлме пулать.

- Сасăлав хăçан?

- Майăн 22-мĕшĕнче 8 сехетрен пуçласа 20 сехетчен.

- Кам шутлать?

- “Единая Россия” парти членĕсенчен тăракан шутлав комиссийĕсем. Вĕсен ку тĕлĕшпе ĕç опычĕ пысăк. Унсăр пуçне кашни кандидат шутлав мĕнле пынине хăй е унăн çынни сăнаса тăма пултарать.

- Ун хыççăн мĕн?

- Чи нумай сасă пухнă кандидатурăсем депутата суйланма тăратма тивĕçлĕ пулаççĕ. Патшалăх Думи тĕлĕшпе депутата суйланма кандидата тăратассине “Единая Россия” партин съезчĕ йышăнать, ЧР Патшалăх Канашне республикăри конференци çирĕплетет.

- Массăллă информаци хатĕрĕсем пĕлтернĕ тăрăх, Эсир те хăвăрăн кандидатурăна РФ Патшалăх Думине суйланма тăратнă-мĕн?

- Çапла, мана Канашри пĕр мандатлă 37-мĕш суйлав округĕпе малтанхи сасăлава хутшăнма регистрациленĕ.

- Пурĕ миçе участнике регистрациленĕ?

- Малтанах çакна аса илтеретĕп: РФ Патшалăх Думине суйлавĕпе Чăваш Республикине пĕр мандатлă икĕ суйлав округне - Канаш /37%/ тата Шупашкар /38%/ округĕсене пайланă. Унсăр пуçне депутатсен пĕр пайĕ парти списокĕпе суйланать. Çапла вара Канаш округĕпе партин малтанхи сасăлавне 19, Шупашкар округĕпе 16 участнике тăратнă, 24 участник парти списокне кĕме кăмăл тунă.

Чăваш Республикин Патшалăх Канашĕн суйлавĕ пĕр мандатлă 22 округпа тата парти списокĕсемпе иртĕ. Мĕнпур участниксен хисепĕ халех 100 çын ытла.

“Единая Россия” партин вăйлă команда. Çынсен вĕсенчен суйласа илме пысăк майсем пур.

Эпĕ республикăра пурăнакансене майăн 22-мĕшĕнче сасăлав участокне пырса хăйсен суйлавне туса ирттерме ыйтатăп. Пирĕншĕн кашни сасă пĕлтерĕшлĕ!

И.СЕЛЕЗНЕВ ыйтса пĕлнĕ.