13 апреля 2016 г.
Тăван тавралăха тирпей-илем кĕртес, симĕслентерес, хамăр пурăнакан вырăна санитари тĕлĕшĕнчен йĕркене кĕртес, ăна хăтлăрах, илемлĕрех тăвас тĕллевпе кашни çул ирттерекен экологи уйăхлăхĕ апрелĕн 11-мĕшĕнче старт илчĕ.
Кăçал çуркунне ир килчĕ. Юр хăвăрт ирĕлнине пула хĕллехи вăхăтра пухăннă çÿп-çапа тасатас ĕç те чылай маларах пуçланчĕ. Район центрĕн урамĕсемпе иртсе çÿренĕ май иртнĕ эрне пуçламăшĕнчех çакна асăрхарăмăр: Елчĕк ял тăрăхĕн администрацийĕнче ятарласа çирĕплетнĕ çынсем урамсенче, çулсен хĕррисенче куçа курăнакан ăпăр-тапăра пуçтарчĕç.
Район центрĕн урамĕсенчи ватă йывăçсене касса илемлетесси çине те юлашки çулсенче пысăк тимлĕх уйăраççĕ. Арçынсен ушкăнĕ иртнĕ эрнере Совет урамĕнчи йăмрасене касса йĕркене кĕртнĕ.
Сăнÿкерчĕкре: Елчĕкри техника инвентаризацийĕн бюровĕн ĕçченĕсем хăйсен организацийĕн территорине тирпей-илем кĕртеççĕ. Коллектив ку енĕпе яланах хастар.