13 апреля 2016 г.
Виçĕмкун район администрацийĕн пуçлăхĕ Николай Миллин райадминистрацин структура подразделенийĕсен, ял тăрăхĕсен, предприятисемпе организацисен ертÿçисемпе канашлу ирттернĕ.
Район администрацийĕн пуçлăхĕн пĕрремĕш çумĕ - финанс пайĕн ертÿçи Галина Анисимова районăн пĕрлештернĕ бюджетне пĕрремĕш кварталта мĕнле пурнăçлани çинчен каласа пачĕ. Пĕрремĕш кварталта тĕрлĕ шайри бюджета районти предприятисемпе организацисенчен, усламçăсенчен 26380 пин тенкĕ, е пĕлтĕрхи çак вăхăтринчен 5 млн тенкĕ ытларах налук укçи пырса кĕнĕ.
Районăн пĕрлештернĕ бюджечĕн тупăшсен пайĕ 59399 пин тенкĕпе танлашнă, çав шутран 16904 пин тенки хамăр патăмăрта пухăннă тупăшсем. Çак икĕ кăтарту та 2015 çулхи пĕрремĕш кварталтинчен пысăкрах.
Районти тĕп больницăн тĕп врачĕ Надежда Уркова кун йĕркинчи «Сывлăх профилĕ» тема çине куçиччен çын пурнăçне сиенлĕ витĕм кÿрекен пулăмсем çинче чарăнса тăчĕ. 2015 çулта районта 317 çын вилнĕ. Çав шутран 62-шĕ вăйпитти çулсенчи çынсем. 62 çынран 57-шĕ арçынсем, 5-шĕ çеç хĕрарăмсем. Вăтам пурнăç тăршшĕ 2015 çулта 2014 çулхипе танлаштарсан 1 çул ÿснĕ, 72 çула çитнĕ. Çынсене пурнăçран вăхăтсăр уйăракан чирсем: чĕрепе юн тымарĕсен, нерв системин, сывлав органĕсен чирĕсем.
Çын нумай çул сывă пурăнасси тÿрремĕн мĕнле пурнăç йĕркине тытса пынинчен килет. Пурнăç тăршшĕпе мĕнле условисенче пурăнни, ăруран ăрăва куçса пыракан сывлăх, çавăн пекех сывлăха сыхлас ĕçе мĕнле йĕркелени витĕм кÿреççĕ.
- Кашни регионăн, районăн, çемьен сывлăх профилĕ пулмалла, - терĕ Надежда Викторовна. - Районти тĕп больницăн сывлăх профильне те туса хатĕрленĕ. Вăл ытти профессипе ĕçлекенсенчен тем тери уйрăлса тăмасть пулин те хăйнеевĕрлĕхĕпе паллă.
Надежда Уркова кашни çын нумай çул сывă пурнăçпа пурăнтăр тесен чи кирлĕ, чи ансат правилăсене аса илтерчĕ. Вĕсен шутне физкультурăпа тата спортпа туслă пулни, производство гимнастики туни, стреслă лару-тăрура сыхланасси тата ăна сирсе ярасси, тĕрĕс апатлану, диспансеризаци витĕр тухни, шалти тата ытти хăш-пĕр органсене кашни çул тĕрĕслеттерни, юн пусăмне, кĕлетке виçине, сахăр, холестерин шайне тĕрĕслесе тăни, пирус туртманни, эрех-сăрапа иртĕхменни тата ытти те.
Район администрацийĕн пуçлăхĕн пĕрремĕш çумĕ Леонард Левый шăматкун «Улăп» спорткомплексра ветерансем хушшинче волейболла выляссипе иртнĕ ăмăртупа паллаштарчĕ.
Уявсем - Майăн 1-мĕшĕ, Аслă Çĕнтерÿ кунĕ çывхарса килеççĕ. Майăн 1-мĕшĕ аслă Мăнкун уявĕпе пĕр кун килнĕрен унпа çыхăннă мероприятисене апрелĕн 29-мĕшĕнче ирттереççĕ. Çав кун районта Хисеп хăми çине 2016 çулта кĕме тивĕç пулнă хастарсене чыслаççĕ.
Леонард Левый çитес Аслă Çĕнтерÿ çулĕ юбилейлă çул пулмасан та малашне те ăна çак шайри уяв пек йĕркелесе ирттермеллине палăртрĕ. Кăçал ăна районта ирттерес енĕпе йĕркелÿ комитечĕ туса хунă ĕнтĕ. Канашлура оргкомитет членĕсем те пулнăран Майăн 9-мĕшне хатĕрленсе кĕтсе илес тĕлĕшпе пурнăçламалли ĕçсене асăнчĕ. Палăксене, территорисене, обществăлла вырăнсене тирпей-илем кĕртме паянах тухмалла. Уяв ялсенче майăн 8-мĕшĕнче, район центрĕнче тепĕр кун иртет.
Канашлура район пурнăçĕпе çыхăннă ытти ыйтусене те пăхса тухрĕç.