09 апреля 2016 г.
«Прогресс» акционерсен хупă обществинче кĕрхи культурăсене минераллă удобренисемпе апатлантараççĕ. Ку чухне вĕсем вырăнта ăсталанă «Туман» йышши агрегатпа кăçалхипе виççĕмĕш çул тухăçлă усă кураççĕ.
Яваплă ĕçе пурнăçлама, яланхи пекех, Дмитрий Кучков ăста механизатора çирĕплетнĕ. Малтанхи кунсенче вăл тăваттăмĕш бригадăри 80 гектар йышăнакан кĕрхи культурăсен лаптăкне минераллă удобренисемпе апатлантарчĕ. Ун хыççăнах пĕрремĕш бригадăри уя куçрĕ. Кунта çак ĕçе 100 гектар çинче пурнăçламалла. Яваплă ĕçре Виталий Петров та тăрăшулăх кăтартать.
Кĕтме вăхăт çук - васкамалла. Çĕрле шăнтнипе усă курса анасенче пылчăк çăрăлма пуçличчен кĕрхи культурăсен пĕтĕм лаптăкне /вăл пĕтĕмпе 1000 гектар йышăнать/ минераллă удобренисемпе апатлантарса хăварма ĕлкĕрмелле.
Сăнÿкерчĕкре: «Прогресс» акционерсен хупă обществинчи уй-хирти хĕрÿ ĕç пуçламăшĕн саманчĕ.