09 апреля 2016 г.
Нумай хваттерлĕ çуртсен пĕрлехи пурлăхне тĕпрен юсамалли ятарлă программăсене пурнăçласа 2016 çулта район центрĕнчи нумай хваттерлĕ 2 çуртра капиталлă юсав ĕçĕсене пурĕ 977 пин тенкĕлĕх туса ирттерме палăртнă.
Уйрăммăн илсен, Андреев урамĕнчи 6-мĕш çуртра электричествăпа тивĕçтерес тытăма çĕнетсе улăштармалла тата Комсомольски урамĕнчи 3-мĕш çуртри путвала тĕпрен юсамалла. Çанталăк ăшăтса пынă май çак ĕçсене пурнăçлама тытăнмалла.
Сăмах май, 2015 çулта район центрĕнчи нумай хваттерлĕ 3 çуртра электричествăпа тивĕçтерес тытăмра 890 пин тенке яхăнлăх, унсăр пуçне, «Нумай хваттерлĕ çуртсен çумĕнчи территорисене, нумай хваттерлĕ çуртсен территорине пымалли çул-йĕре юсасси» программăпа килĕшÿллĕн 4 çурт умĕнче 1226 тăваткал метр лаптăка 1334,85 пин тенкĕлĕх юсанă.
Чăнах та, юлашки çулсенче нумай хваттерлĕ тата вĕсен çумĕнчи территорисене юсама нумай укçа-тенкĕ хываççĕ. Ултă çул хушшинчи тапхăрта пирĕн районта нумай хваттерлĕ çуртсен 60 процентне - пурĕ 25 çурта тĕпрен юсанă. 2015 çулта пĕрлехи пурлăха тĕпрен юсамалли фондăн регионри операторĕн фондне çирĕплетнĕ. Елчĕк районĕнче нумай хваттерлĕ çуртсен пĕрлехи пурлăхне юсамалли кĕске вăхăтлă плана та çирĕплетнĕ.