09 апреля 2016 г.
Призыв комиссийĕн ларăвĕ
Çурхи призыв пуçланчĕ.
Районта призыв комиссийĕн пĕрремĕш ларăвĕ иртнĕ. Ăна район администрацийĕн пуçлăхĕн пĕрремĕш çумĕ - вĕренÿпе çамрăксен политикин пайĕн начальникĕ Л.Левый ертсе пынă. Çурхи призывра районти 26 каччă Раççей Çарĕн ретне тăрĕ. Çамрăксем çар тивĕçне тулли кăмăлпа пурнăçлама хатĕррине палăртаççĕ.
Музейре - çĕнĕ выставка
Аслă Çĕнтерÿ 71 çул çитнине халалласа Елчĕкри историпе тăван тавралăх халăх музейĕнче Совет Союзĕн Паттăрĕсен ячĕпе курав уçăлнă.
Республикăра Совет Союзĕн Геройĕсем 124, Мухтав орденĕн тулли кавалерĕсем - 24. Паян Чăваш Енре Раççей Федерацийĕн Геройĕсем 12 шутланаççĕ.
Пирĕн районти Совет Союзĕн Паттăрĕсем А.Ф.Беляев, С.А.Андреев, Н.П.Иванов ячĕсемпе Елчĕк ялĕнчи урамсем хисепленсе тăраççĕ. Паттăрсен сăнÿкерчĕкĕсемпе, пурнăçĕпе тĕплĕнрех паллашма пулать куравра.
Ветерансене - пурăнмалли çурт-йĕр
Ака уйăхĕн 1-мĕшĕ тĕлне районта пурăнакан Аттелĕхĕн Аслă вăрçин 195 ветеранĕпе салтак арăмĕ пурăнмалли çурт-йĕр условийĕсене лайăхлатма заявлени панă, вĕсенчен 192-шĕн ыйтăвне тивĕçтернĕ.
Çак кунсенче тата виçĕ ветеран çурт-йĕрне лайăхлатма сертификатсем илнĕ. Вĕсенчен пĕри - Энтепери Тихон Табаков. Çар службинче вăл 1944 çулхи сентябрьтен пуçласа 1945 çулхи сентябрьччен пулнă. Хăюлăхпа хастарлăхшăн илнĕ наградăсем нумай унăн. Яла таврăнсан колхозра тĕрлĕ çĕрте вăй хунă. Хальхи вăхăтра ветеран пĕчченех пурăнать. Сурăхсемпе чăх-чĕп усрать. Хĕлле çур ял çынни вăл тапнă кăçатăпа çÿрет. Тихон Григорьевич районти смотр-конкурссене те хутшăнать, балалайка каласа çынсене савăнтарать.
Кинофильмсем пăхаççĕ
Кино çулталăкĕнче Шăмалак ял библиотекин вулав залĕнче кинофильмсем пăхассине йĕркеленĕ.
Малтанах шкул ачисем «Офицеры» фильм курнă. Аслăраххисем «Королева бензоколонки» фильма килĕштернĕ. Çывăх вăхăтра вулакансем «Неподдающиеся», «Дочь» кинофильмсем курĕç. Кунтах «Кĕнеке экрансем çинче пурăнать» выставкăпа паллашма пулать.
Пĕрремĕш тухнă
Чăваш Енри Вĕренÿ министерствин ачасене хушма пĕлÿ паракан «Эткер» центрĕ Крым Раççейпе пĕрлешнине халалласа ачасен ÿкерчĕкĕсен конкурсне ирттернĕ.
Унта Елчĕкри искусство шкулĕнчи Ксения Агеева та хутшăннă. «Крым миршĕн» композици ÿкерсе Ксения пĕрремĕш вырăн çĕнсе илнĕ.