06 апреля 2016 г.
Чăваш патшалăх оперăпа балет театрĕнче çирĕм çул каялла пурнăçа кĕме тытăннă проект - Пĕтĕм тĕнчери балет фестивалĕ - кирек мĕнле йывăр вăхăтра та куракана савăнтарнă. Кăçал, ытти çулсенчи пек, чикĕ леш енчи ташăçăсем пулман пулсан та, Мускав, Питĕр, Йошкар-Ола артисчĕсем куракана тăватă кун кĕвĕ-çемĕ, ташă тĕнчине илсе кĕнĕ.
Çирĕммĕш фестиваль хамăрăн «Спящая красавица» премьерăпа уçăлнă. Унтан куракан Э.Сапаев ячĕллĕ Мари патшалăх оперăпа балет театрĕн «Мастер и Маргарита» спектаклĕпе, Мускаври «Новый балет» театрĕнче Константин Кейхель Оскар Уайльдăн «Соловей и роза» юмахĕ тăрăх лартнă «Зимняя роза» балечĕпе кăсăкланса паллашнă.
Гала-концерт та тĕлĕнтернĕ. Хăнасем - Питĕрти Н.Римский-Корсаков ячĕллĕ патшалăх консерваторийĕн оперăпа балет театрĕн артисчĕ, пĕтĕм тĕнчери конкурссен лауреачĕ Олеся Гапиенко, Михайловка театрĕн ташăçи Антон Плоом, Раççей Пысăк театрĕнчи Диана Косыревăпа Андрей Меркурьев, «Кремль балечĕ» патшалăх театрĕнчи Александра Тимофеевăпа Михаил Мартынюк, хамăр артистсем - Чăваш халăх артисчĕ Айдар Хисамутдиновпа Татьяна Альпидовская ташлани пурне те килĕшнĕ.
Фестиваль вĕçленнĕ, унăн ăшă туйăмĕсене куракан çитес çулчченех упрĕ.