06 апреля 2016 г.
Ака уйăхĕн 1-мĕшĕнче район администрацийĕн пуçлăхĕн çумĕ - финанс пайĕн начальникĕ Галина Анисимова, районти халăха социаллă пулăшу паракан пай начальникĕ Ирина Аникина тата халăха ĕçпе тивĕçтерекен центр специалисчĕсем Чăваш Республикинчи ĕç тата социаллă хÿтлĕх министрĕ Сергей Димитриев ирттернĕ аудиоселектор канашлăвне хутшăнчĕç.
Канашлури тĕп сăмах çынсене адреслă тата кирлĕлĕх виçине шута илсе паракан патшалăх çăмăллăхĕсем пирки йышăннă ыйтусем пирки пулчĕ. Сергей Димитриев хальхи вăхăтра çынсене хумхантаракан чи çивĕч ыйтусене хускатрĕ. Вăл чи малтан çакăн пирки чарăнса тăчĕ: Раççей Президенчĕ Владимир Путин граждансене социаллă пулăшу, хÿтлĕх парассинчи ыйтусене черетлĕ бюджет çырăвĕнче палăртса каланă. Çавна май Раççей Правительствине, федераци субъекчĕсене хушусемпе уйрăм сĕнÿсем панă.
Чăваш Республикине илес пулсан, патшалăх пулăшăвĕ парассин мĕнпур енне сыхласа хăварнă.