06 апреля 2016 г.
Çулçÿрев йĕркисене пăхăнассипе водительсем те, çуран çÿрекенсем те пĕр пекех яваплă.
Иртнĕ çул районти çулсем çинче 20 инкек пулса иртнĕ. Вĕсенче 27 çын аманнă. Анчах пурнăçран уйрăлакансен йышĕ ÿссе пыни пăшăрхантарать - инкексенче 5 çын вилнĕ.
Çулçÿрев йĕркисене пăхăнманнипе çуран çÿрекенсен айăпĕпе 3 инкек пулнă - вĕсенче 3 çын пурнăçран уйрăлнă, 2-шĕ аманнă. Ачасем хушшинче пулнă 3 инкекре 4 çын тĕрлĕ суран илнĕ.
Руль умне ÿсĕрле ларнă водительсен айăпĕпе çулсем çинче 3 инкекре 3 çын аманнă, 8-шĕ суранланнă.
Çулçÿрев йĕркисене пăхăнманнисен йышĕ çав-çавах пысăк - иртнĕ çул 686 административлă протокол çырнă, çав шутра 59 водитель автомашина рулĕ умне эрех-сăра ĕçнĕ хыççăн та ларма именмен. Мĕн шутланă-ши вĕсем;
Пурĕ 10 водителе арестленĕ. Çулçÿрев йĕркисене пăснăшăн 84 ĕçе суда ярса панă.
Çул çинчи инкексенчен сыхланас тĕллевпе тĕрлĕ профилактика ĕçĕсене пурнăçлатпăр: право йĕркисене пăсакансене тупса палăртассипе рейдсем йĕркелетпĕр, вĕренÿ организацийĕсемпе автотранспорт хуçалăхĕсенче калаçусем, тĕлпулусем ирттеретпĕр, хаçат-журналсенче материалсем пичетлетпĕр.
Çул çинчи инкексенчен ытларах пайĕ автоçулсен пахалăхĕнчен пулнине кашниех ăнланать. Пирĕн район территорийĕнче автоçулсем 192,3 çухрăм йышăнаççĕ, çав шутран 55,2 çухрăмĕ республика пĕлтерĕшли. Вĕсене пăхса тăрас енĕпе «Яльчикское» ДПМК» тулли мар яваплă общество, «Чувашавтодор» акционерсен уçă обществин Патăрьелĕнчи ДРСУ яваплă.
Иртнĕ 2015 çулта çул-йĕре тивĕçлĕ пăхса тăманшăн организацисен ячĕпе 27 хушу çырнă, должноçри 5 çынна административлă майпа явап тыттарнă.
А.АДЮКОВ,
РФ ШĔМĕн муниципалитетсем хушшинчи «Комсомольский» уйрăмĕн ГИБДД
пайĕн административлă саккунсене пурнăçа кĕртессипе ĕçлекен инспекторĕ.