02 апреля 2016 г.
Чăваш Ен делегацийĕ - республика Пуçлăхĕ Михаил Игнатьев ертсе пынипе - икĕ кун Челябинск облаçĕнче пулнă.
Республика ертÿçи Челябинск облаçĕн кĕпĕрнаттăрĕпе Борис Дубровскипе тĕл пулса калаçнă, бизнеса аталантарас, çак тытăмри ĕç опычĕпе пĕр-пĕрне паллаштарас ыйтусене сÿтсе явнă. Челябинск облаçĕ çĕршывра металлурги центрĕсенчен пĕри шутланать. Чăваш Ен пĕтĕмĕшле металăн 27-28 процентне çакăнтан туянать. Кĕпĕрнаттăра пирĕн республикăра аталанакан электротехника промышленноçĕ кăсăклантарнă. Юлашкинчен Михаил Игнатьевпа Борис Дубровский Челябинск облаçĕн Правительствипе Чăваш Республикин Министрсен Кабинечĕ суту-илÿ, социаллă пурнăçпа культура тата ытти енпе хутшăнса ĕçлеме палăртакан Килĕшĕве алă пуснă.
Чăваш Ен делегацийĕ Челябинск облаçĕнчи чылай предприяти ĕçĕпе паллашнă.