26 марта 2016 г.
ЧР Пуçлăхĕ Михаил Игнатьев ертсе пынипе Терроризмпа кĕрешекен комисси ларăвĕ иртнĕ. Унта сÿтсе явнă тĕп ыйту - 2018 çулта тĕнчери футбол чемпионатне ирттермешкĕн усă курма палăртнă спорт объекчĕсен терроризм хăрушсăрлăхĕпе çыхăннă хÿтлĕхне тивĕçтересси.
Михаил Игнатьев Шупашкарти «Олимпийский» тата «Спартак» стадионсене чемпионата хутшăнакан командăсен тренировка базисен шутне кĕртнине, республикăн çакнашкал сумлă мероприятисем ирттерессипе çыхăннă опыт пуррине палăртнă. Чи малтанах çынсен хăрушсăрлăхне тĕпе хумалла, юлашки вăхăтра тĕнчере терактсем çине-çинех пулнине кура - пушшех.
Тивĕçлĕ тытăмсен ертÿçисем чемпионата хатĕрленсе пурнăçлакан ĕçпе паллаштарнă. ФХСăн республикăри управленийĕн пуçлăхĕ Сергей Софронов хăрушсăрлăх енĕпе мĕнпур ведомствăн çыхăну тытса ĕçлемеллине палăртнă. Чăваш Ен Пуçлăхĕ комисси членĕсене пĕтĕм ĕçе çирĕп йĕркелесе пыма чĕнсе каланă.