26 марта 2016 г.
Шкул ачисем хушшинче çулсерен иртекен Раççей олимпиадин регионсенче йĕркеленекен тапхăрĕ хыçра. Часах пултаруллă вĕренекенсем çĕршыв шайĕнчи ăмăртусене хутшăнаççĕ. Республика чысне пирĕн районти вĕренекенсем те хÿтĕлени савăнăç кÿрет.
ЧР вĕренÿ институтĕнче Чăваш Ен чысне Раççей шайĕнче хÿтĕлеме хатĕрленекенсен ячĕпе «Çитĕнÿ патне хăвăн çулна туп» чыслав ирттернĕ. Унта Чăваш Республикин Правительствин вице-премьерĕ Алла Салаева, вĕренÿпе çамрăксен политикин министрĕ Владимир Иванов, Шупашкар хула администрацийĕн ертÿçи Алексей Ладыков хутшăннă.
Республикăра вĕренÿ тытăмне аталантарассишĕн çине тăни Раççей шайĕнче ырăпа палăрма витĕм кÿрет. Курăмлă çитĕнÿ -олимпиадăсенче малти вырăнсене йышăнассипе Чăваш Ен чи лайăх вунă регион шутĕнче пулни.
Кăçал районти вĕренекенсем регионти олимпиадăра пысăк ÿсĕмсем турĕç. Лаш Таяпари Ольга Маркова, Андрей Павлов экологипе, Елчĕкри Дмитрий Смирнов нимĕç чĕлхипе, Данил Кондратьев физкультурăпа çĕнтерÿçĕсем пулса тăчĕç.
Чыслава ашшĕ-амăшĕпе вĕрентекенсене те йыхравланă. Ачан тĕрлĕ предметпа пĕлÿ шайĕ пысăккинче вĕсен тÿпи те пысăккине палăртмасăр иртеймĕн.
Хальхи вăхăтра Елчĕкри Андрей Данилов астрономи предмечĕпе Раççей шайĕнчи олимпиадăра тупăшать.
М.ЧЕРНОВА.