26 марта 2016 г.
Чăваш Ен Правительствин Председателĕ И.Моторин ертсе пынипе Аттелĕхĕн Аслă вăрçинче Çĕнтерÿ тунăранпа 71 çул çитнине савăнăçлă уявлас енĕпе лару иртнĕ.
Хальхи вăхăтра республикăра Аттелĕхĕн Аслă вăрçин 1250 инваличĕпе участникĕ, «Блокадăри Ленинградра пурăннăскер» паллăна тивĕçнĕ 49 çын, фашистсен тыткăнĕнче пулнă çул çитмен 79 çамрăк, вилнĕ вăрçă участникĕсен 62 тăлăх арăмĕ, вилнĕ воинсен 5 пин тăлăх арăмĕ, 18,9 пин тыл ветеранĕ пурăнаççĕ.
Кăçал ветерансене чыс тума республика бюджетĕнчен 731,2 пин тенкĕ уйăраççĕ. Мероприятисен пĕр пайне волонтерсем пулăшнипе йĕркелеççĕ.
И.Моторин çамрăксене вилнĕ салтаксен вилтăприсене йĕркене кĕртме чĕнсе каланă. Çавăн пекех вырăнти хăйтытăмлăх органĕсен Аттелĕхĕн Аслă вăрçин ветеранĕсен пурăнмалли çурт-йĕр условийĕсене те тĕпчемелле.