26 марта 2016 г.
Кашни çулах районти театр коллективĕсем валли «Театр тĕнчинче», «Юмах тĕнчинче», «Мельпомена асамĕ» фестиваль-конкурссем ирттеретпĕр. Вĕсене аслă ăру çыннисемпе пĕрле ачасем те йышлăн хутшăнаççĕ. Иртнĕ çул Елчĕкри халăх театрĕ Г.Терентьевăн «Ют çын» драмине сцена çине кăларчĕ. Халăх театрĕ çумĕнчи «Сириус» студине çÿрекен ачасем «Новогодний теремок» спектакльпе шкул ачисене савăнтарчĕç. Ялсенчи культура çурчĕсем çумĕнче йĕркеленнĕ драма кружокĕсен артисчĕсем кăтартакан спектакльсене куракансем ăшшăн йышăнаççĕ. Ял çынни спектакль курма кăмăллать.
Ялти артистсем хăйсен пултарулăхне таврари ялсенче кăтартни паха. Зал тулли халăх пухăннине курсан чун савăнать. Курнавăшри «Сенкер чаршав», Вăрăмхăвари «Илемпи», Аслă Таяпари «Çутă çăлтăр», Аслă Пăла Тимешри «Сармантей» драма кружокĕсем иртнĕ çул пысăк ÿсĕмсемпе палăрчĕç.
Драма кружокне çÿрекенсем СССР халăх артистки Вера Кузьмина ячĕпе йĕркелекен республикăри «Чĕрĕ сăмах» конкурса çулсерен хутшăнаççĕ. Елчĕк халăх театрне, Вăрăмхăвари, Аслă Таяпари, Шăмалакри, Таяпа Энтринчи, Тăрăмри, Кивĕ Эйпеçри драма кружокне çÿрекенсем тĕп хуламăртан дипломсемпе, парнесемпе таврăнчĕç.
Районта Чăваш АССР халăх артисчĕ И.Молодов çуралнăранпа 110 çул çитнине халалласа сăвă çыракансен конкурсĕ те çÿллĕ шайра иртрĕ. Юлашки вăхăтра Шупашкарти артистсем те Елчĕке спектакльсемпе килсех çÿреççĕ. Район центрне тавра ялăн çыннисем ушкăнпа пуçтарăнсах килни кăмăла çĕклет.
Кашни виçĕ çултан халăх театрĕ ята республикăра хÿтĕлетпĕр. Иртнĕ çул республикăри «Мухтав ахрăмĕ» фестивалĕн пĕтĕмлетĕвĕ Элĕкре иртрĕ. Эпир унта Г.Терентьевăн «Ют çын» драмипе иккĕмĕш вырăн çĕнсе илтĕмĕр. Куракансем ыйтнипе çак спектакле районти ялсене çитсе кăтартас кăмăлпа хавхаланса ĕçлетпĕр. Кăçал йăлана кĕнĕ «Театр тĕнчинче» фестивале ака уйăхĕнче ирттерме палăртнă.
В.ПАНКРАТОВА,
Елчĕкри халăх театрĕн режиссерĕ.