25 февраля 2016 г.
Ялхуçалăх предприятине çĕнĕрен йĕркелесе янăранпа 10 çул çитнине халалланă «Победа» ОООри ĕçченсен черетлĕ - 2015 çулхи ĕç кăтартăвĕсене пĕтĕмлетекен отчетлă пухăвĕ савăнăçлă лару-тăрура иртрĕ.
Йывăрлăхсене çĕнтерсе кĕске вăхăтра аталану çулĕ çине тăнă «Победа» ялхуçалăх предприятийĕн халĕ хăйĕн гимнĕ те пур. Шупашкарти юрăпа ташă ансамблĕн солистки Ольга Лукова «Çĕнтерÿшĕн» юрра шăрантарнине уяв кĕрекинчи ĕçченсем ура çине тăрса итлерĕç.
...Халĕ ĕнтĕ çакна çирĕплетсех калама пулать: иртнĕ ырă вăхăтри ят-сум «Победа» ялхуçалăх предприятине каялла таврăнать. Çакна вĕсен кашни çулхи ĕç кăтартăвĕсене тишкернинчен курса ĕненетпĕр. Хăватлă йышши техникăсемпе усă курни, фермăри пур витене тĕплĕ реконструкци туса çĕнĕ условисенче ĕçлемелле хатĕрлесе çитерни ĕç тухăçлăхне нумай ÿстерме май панă. Тепĕр пысăк сăлтав - çынсене ĕçлеме чи лайăх условисем туса пани. Çавна май «Победа» ОООри кашни çын хăйĕн ĕç вырăнĕнчи тивĕçне туллин пурнăçлать, ĕçрен те киле кашни кун хавхалануллă кăмăл-туйăмпа таврăнать. Мĕншĕн тесен, ял шайĕпе илсен, ĕç укçине те сахалах илмеççĕ вĕсем. Иртнĕ çул кашни ĕçлекен çыннăн пĕр уйăхри вăтам шалăвĕ 16811 тенкĕрен кая мар пулнă. Хăш-пĕр ĕçченсем тата ытларах - дояркăсем 22 пин тенке яхăн, механизаторсем 20 пин тенкĕ ытла ĕç укçи алла илнĕ.
- Ялхуçалăх производствине йĕркелесе пырассинче йывăрлăхсем сахал мар. Çав шутра туса илекен продукцин рынокри сутлăх хакĕ тивĕçтерменни те. Пытармасăр каласан, иртнĕ çул сĕтĕн сутлăх хакĕ 2014 çулхинчен те йÿнĕрех пулчĕ. Апла пулин те эпир çак тăкака ĕçлекен çын шучĕпе саплаштарма тăрăшман. Вĕсене тивĕçлĕ ĕç укçи тÿленĕ, - тет Николай Александрович Головин директор.
Ялхуçалăх предприятийĕн юбилей çулталăкĕнчи отчетлă пуху ĕçне пĕтĕмлетме район администрацийĕн пуçлăхĕн пĕрремĕш çумĕ Леонард Левый хутшăнчĕ. Ялхуçалăх производствине аталантарассинче тивĕçлĕ тÿпе хывакан ĕç паттăрĕсене вĕсен пархатарлă ĕçĕшĕн тав тунипе пĕрлех хуçалăх тилхепине çак çулсем тăршшĕпех çирĕп тытса пыракан Николай Головина, хастар ĕçченсене - Иван Евдокимовпа Анатолий Алексеева, Олег Осиповпа Владислав Елисеева район администрацийĕн Тав çырăвĕсене парса чыс турĕ. Унăн сăмахĕсем çумне Аслă Пăла Тимеш ял тăрăхĕн пуçлăхĕ Александр Портнов, «Энергогарант» страхлакан компанин Атăлпа Вятка филиалĕн директорĕ Татьяна Кузьмина, ертÿçĕн спортри тусĕ Анатолий Молоствов тата ыттисем те хутшăнчĕç.
Уяв пур ĕçчен кăмăлне каймалла иртрĕ. Кашни çынна ятран палăртса парнесем пани, чăваш халăх артистки Людмила Семенова ертсе пыракан Шупашкарти юрăпа ташăпа ансамблĕн чаплă концертне курса киленни ял-йыш асĕнче нумайлăха юлĕ...
Светлана АРХИПОВА.