19 марта 2016 г.
Кăçалхи июлĕн 1-мĕшĕнчен пуçласа августăн 15-мĕшĕччен иртекен Пĕтĕм Раççейри ялхуçалăх çыравне кĕтсе илме тĕрлĕ мероприятисем йĕркелеççĕ.
2015 çулхи июлĕн 1-мĕшĕнчен пуçласа «Манăн Раççей» фотоконкурс иртнĕ. Ăна йĕркелекенсем Чăваш Республикинче пурăнакансем унта хастар хутшăннине палăртнă. Ун хыççăн ачасен сăнÿкерчĕкĕсен «Манăн тăван ялăм» регионри конкурсĕ, шкул ачисем хушшинче «Ялта йĕрке пулсан çĕршывра та чăн ырлăх» викторина иртнĕ.
Пĕтĕм Раççейри ялхуçалăх çыравĕн пресс-центрĕнче ĕмĕртен пыракан вырăс фольклорĕ пирки те манса кайман. Çакна шута илсе Росстат мартăн 1-мĕшĕнчен пуçласа юрă-такмаксен конкурсĕ пуласси çинчен пĕлтернĕ.
Конкурса хутшăнакансен юрă-такмакра ялхуçалăх çыравĕ - çыравçă ĕç-хĕлĕ, вĕсем ялта пурăнакансемпе, ялхуçалăх предприятийĕсемпе хресчен /фермер/ хуçалăхĕсен ертÿçисемпе, сад-пахча çитĕнтерекенсемпе хутшăнса ĕçлени çинчен ансат, халăх чĕлхипе каласа кăтартмалла.
Хăвăр ĕçĕрсене текст çырса е видеоформатпа тăратма пултаратăр. Юрă-такмаксен пĕчĕк роликне мобиль телефонĕ çине ÿкерсе илме те пулать. Хăш мелпе усă курасси - сирĕн ирĕк. Юрă-такмаксен текстне конкурса хутшăнакан çыннăн мĕнпур даннăйĕсене палăртса çак электронлă адреспа ярса памалла: kuplet@vshp2016.ru. Видеоформата YouTube видеохостинг çине вырнаçтармалла.
Конкурс ĕçĕсене 2016 çулхи çу уйăхĕн 31-мĕшĕччен йышăнаççĕ. Преми фончĕ 50 000 тенкĕпе танлашать. Унсăр пуçне, уйрăм премисене те çирĕплетеççĕ. Конкурс Положенийĕпе 2016 çулхи Пĕтĕм Раççейри ялхуçалăх çыравĕн пресс-центрĕн http://www.vshp2016.ru/contest/ сайтĕнче тĕплĕнрех паллашма пулать.