19 марта 2016 г.
Кăçалхи пĕрремĕш çур çулта коммуналлă пулăшу тарифĕсем улшăнмаççĕ, иртнĕ çулхи раштав уйăхĕнчи пекех юлаççĕ. 2016 çулта пĕрре çеç - утă уйăхĕн 1-мĕшĕнчен - улшăнаççĕ.
Ăшă энергийĕ республикăра пурăнакансемшĕн 2,4-13,7 процент хакланать. Ресурссемпе тивĕçтерекен кашни организаци валли пурăнмалли вырăна хутса ăшăтассипе, унта вĕри тата сивĕ шыв парса тăрассипе, унтан таса мар шыва юхтарса кăларассипе çыхăннă пулăшу ĕçĕсен тарифĕсене Чăваш Республикин Конкуренци политики тата тарифсем енĕпе ĕçлекен патшалăх служби çирĕплетет.
Сивĕ шывпа тивĕçтерессипе тата таса мар шыва юхтарса кăларассипе çыхăннă пулăшу тарифĕсем 0,5-25 процент ÿсеççĕ.
Раççей Правительствин 2015 çулхи юпа уйăхĕн 2182-р хушăвĕпе килĕшÿллĕн Чăваш Республикинчи граждансен кăçалхи коммуналлă пулăшу тÿлевĕсен вăтам ÿсĕмне çирĕплетнĕ. Вĕсем кăçалхи утă уйăхĕн 1-мĕшĕнчен, çулталăк каяллахипе танлаштарсан, 4,4 процент хутшăнаççĕ. 2014 çулхи чÿк уйăхĕн 1-мĕшĕнчи 2222-р хушура 2016 çул валли республикăшăн палăртнă индексран /4,4 процент/ муниципалитет йĕркеленĕвĕсенче утă уйăхĕн 1-мĕшĕнчен тата 2,3 процент ÿстерме ирĕк панă. Çапла вара хăш-пĕр муниципалитет пĕрлешĕвĕсенче кăçалхи утă уйăхĕн 1-мĕшĕнчен граждансен коммуналлă пулăшу тÿлевĕ чи нумаййи 6,7 процент ÿсет.
Республикăра коммуналлă пулăшу тÿлевĕ вăтамран 4,4 процент ÿсет. Коммуналлă пĕтĕм пулăшушăн, кунта сивĕ тата вĕри шыв, газ, электричество парса тăрасси, пурăнмалли вырăна хутса ăшăтасси, унтан таса мар шыва юхтарса кăларасси кĕрет, 33 тăваткал метр йышăнакан хваттерте пурăнакан пĕр çын пуçне тÿлев 6,4 процент хутшăнать.
Чăвашстат пĕлтернĕ тăрăх, 2016 çулхи нарăс уйăхĕн 1-мĕшĕ тĕлне федерацин Атăлçи округĕнчи регионсен хушшинче коммуналлă пулăшу тÿлевĕ пирĕн республикăра чи пĕчĕккисенчен пĕри. Округри 14 субъектран Чăваш Енре сивĕ шывшăн тата пурăнмалли вырăнтан таса мар шыв юхтарса кăларнăшăн тÿлемелли хак та чи пĕчĕкки, вĕри шыв тÿлевĕпе республика пĕчĕк хаклисен йышĕнче. Елчĕк районĕнче çирĕплетнĕ сивĕ шыв хакĕ республикăри вăтам хакран пĕчĕкрех -унăн 1 кубла метрĕ 22 тенкĕпе танлашать.