19 марта 2016 г.
Çуркуннехи уй-хир ĕçĕсене пурнăçлама «Комбайн» ялхуçалăх производство кооперативĕнче мĕнле хатĕрленнине вырăнти специалистсем пĕрле пухăнса пĕтĕмлетнĕ.
П.Анисимов тĕп агроном çуракири ĕç планĕпе паллаштарнă. Уй-хирти ĕçсем, çанталăк условийĕсем ял çыннине хирĕç пулмасан, 8 кунран ытла вăхăта тăсăлмалла мар. Тĕп агроном ялхуçалăх культурисене акнă, выльăх апачĕ хатĕрленĕ чухне агрономи требованийĕсене пурнăçласси пирки те уйрăммăн чарăнса тăнă.
Д.Чернов тĕп инженер çунтармалли-сĕрмелли материалсемпе, машинăпа техника агрегачĕсемпе тухăçлă тата перекетлĕ усă курасси, А.Сусметов тĕп энергетик производствăри кирек хăш ĕçе пурнăçланă чухне те электричествăпа пĕлсе, асăрханса усă курасси, хăрушсăрлăх техникин инженерĕ Г.Ильин ĕç вăхăтĕнче ĕç сыхлавĕн тата пушар хăрушсăрлăхĕн йĕркисене çирĕп пăхăнса ĕçлесси çинчен чарăнса тăнă.
Ялхуçалăх предприятийĕнче çураки ĕçĕсене пурнăçлама хутшăнакан çынсен сывлăхне медицина учрежденийĕнче тĕрĕсленĕ, ĕçе пикенес умĕн вĕсене тĕллевлĕ инструктаж параççĕ. Механизаторсемпе водительсене ятарлă ĕç тумтирĕсемпе, комбайнсемпе тракторсене пушар сÿнтермелли хатĕрсемпе тата аптечкăсемпе тивĕçтереççĕ. Канашлăва хутшăннă Кавалти фельдшерпа акушер пункчĕн фельдшерĕ О.Изратова инкек-синкекре пĕрремĕш пулăшу памалли йĕркепе паллаштарнă.
Ялхуçалăх предприятийĕнчи семинар-канашлу ĕçне кооператив председателĕ Г.Федоров пĕтĕмлетнĕ. Май пулнипе усă курса 2015 çулхи ялхуçалăх çулталăкне ăнăçлă вĕçленĕ ятпа пурне те тав тунă. Черетлĕ çураки ĕçĕсене пурнăçлама та, ытти çулсенчи пекех, тĕплĕн хатĕрленнине палăртнă. Ака ĕçĕсене кăлтăксăр йĕркелесе ирттерме ăнăçу суннă.