19 марта 2016 г.
Районти ялхуçалăх предприятийĕсенчи тата хресчен /фермер/ хуçалăхĕсенчи фермăсемпе уй-хирсенче çĕнĕ технологисемпе усă курса ĕçлессине çулсерен анлăлатса пынине кура продукци туса илесси, ĕç тухăçлăхĕ ÿсет. Çĕнĕлĕхсене алла илес ĕçре патшалăх пулăшăвĕ те курăмлă.
«АПК аталанăвĕ» наци проекчĕ ĕçе кĕнĕренпе районта пурĕ 40 ытла объекта тĕпрен юсанă тата çĕнĕрен туса хута янă. Иртнĕ çул «Комбайн», Ленин ячĕллĕ, «Труд» ялхуçалăх производство кооперативĕсенче выльăх-чĕрлĕх фермисенче пысăк реконструкци ĕçĕсене туса ирттернĕ, Курнавăшри Юрий Цветков хресчен /фермер/ хуçалăхĕнче тырă тасатса типĕтекен комплекс вырнаçтарнă.
Пĕр-пĕрин ырă тĕслĕхĕпе хавхаланса ĕçлеме хăнăхнă «Энтепе», «Труд», «Рассвет», «Эмметево» ялхуçалăх предприятийĕсенче, финанс кризисĕ ура хунине пăхмасăр, кăçал та пĕлтерĕшлĕ строительство тата реконструкци ĕçĕсене пурнăçлама палăртаççĕ.