19 марта 2016 г.
Наркомани вăл - çын хăйĕн психикине витĕм кÿрекен япаласене пăхăнса тăни. Çак усал чир сарăласси çыннăн характерĕ çирĕпленсе çитменнинчен, хăйне хăй контрольлесе тăрайманнинчен, «курманнин - курас килет» туйăма çĕнтерейменнинчен нумай килет.
Наркотике пĕр хут тутанса пăхсанах тепре те тутанас туртăм вăй илме пуçлать, каярахпа вара вилĕм патне илсе пыракан чиртен хăтăлма питĕ йывăр. Организмăн хÿтĕлев реакцийĕсем çухалаççĕ, пысăкран пысăк доза тутанса çын наркотик чури пулса тăрать.
Чи хăрушши - наркомани чирĕ çамрăксем хушшинче сарăлни. Ăс-тăнĕ арпашăннă çынсем йывăр преступлени те тума пултараççĕ. Хăйсен сывлăхне тÿрлетме çук сиен кÿни пирки вара каламалли те çук: наркоманипе вилĕм - пĕр сăпкара.
Хисеплĕ ашшĕ-амăшĕ, вĕрентекенсем! Ача хăйне-хăй тыткаланă чухнехи улшăнусене, вĕсен психики унчченхинчен уйрăларах тăнине асăрхасанах унпа чуна уçса калаçма тăрăшăр. Хăвăрăн ачăр урамра кампа туслă пулнине, Интернет урлă кампа çыру çÿретнине те сирĕн пĕлмеллех. Кая юлас марччĕ.
Çамрăк ăру спорта юратни, наукăпа, алĕç ăсталăхĕпе интересленни пушă вăхăта усăллă ирттерме май парĕ.
Ачасен кăмăл-туйăмне, ыйтăвĕсене вăхăтĕнче ăнланма тăрăшманни тÿрлетме çук йăнăш патне илсе çитерме пултарать.
А.МОЛОСТВОВ.