16 марта 2016 г.
Лаш Таяпари туристсен «Кашкăр йăви» база территорийĕнче кĕçĕн Çăварни уявне хăйне еверлĕ ирттернĕ.
Юлашки çулсенче кунта тĕрлĕ мероприяти сахал мар йĕркелеççĕ. Вырсарникун «Кашкăр йăвинче» сунарçăсен биатлонĕ тата ытти вăйăсем пулнă.
Хамăр тăрăхри сунарçăсемсĕр пуçне кÿршĕ Тутарстанри тата Мордва Республикинчен килнĕ хăнасем те йĕлтĕрсемпе трасса çине тухнă, пăшалпа тĕл перессипе ăмăртнă. Кунта Аслă Таяпа, Яманчÿрел, Комсомольски ялĕсенчи командăсем палăрнă. Ăмăртăвăн тĕп призĕсĕр - такасăр пуçне кашниех ятарлă значока, медальсемпе грамотăсене тивĕçнĕ.
Çутçанталăка, сунара, спорта халалланă мероприяти сунарçăсене кăна мар, вĕсен çемйисене те чăннипех илĕртнĕ.
Чăн-чăн арçынсем хăйсен ăсталăхне тĕрлĕ вăйăсенче те кăтартнă. Пуртă ывăтса ăмăртассинче А.Хабитовпа Н.Яковлева, армспортра А.Портнова çитекенни пулман.
Хăнасене «Тайпи» фольклор ушкăнĕ, культура ĕçченĕсем хаваслă юрă-кĕвĕпе савăнтарнă. Кашниех икерчĕпе, чейпе, шашлăкпа сăйланнă, катаччи чупнă.