16 марта 2016 г.
Икĕ çул каялла Крым Раççейпе çĕнĕрен пĕрлешнĕ.
2014 çул пуçламăшĕнче Украинăра çĕршывăн саккунлă майпа суйланă президентне тата правительствăна хирĕçле акцисем вăйланнă. Февралĕн 24-мĕшĕнче Евромайдан Виктор Янукович президента вырăнтан кăларнине, хăй влаçа илнине пĕлтернĕ. Паллах, Крымра тата Севастопольте пурăнакансем çакăнпа килĕшме пултарайман - влаçа саккунсăр майпа тытса илнине хирĕçлеме пуçăннă. Севастополь хулинче çĕнĕ мэр суйланă, Крым Автономи Республикин çĕнĕ правительствине йĕркеленĕ. Унăн ертÿçи С.Аксенов Раççей ертÿлĕхĕ патне Крыма йĕркелĕхпе тата лăпкăлăхпа тивĕçтерме ыйтупа тухнă. Раççей Федерацийĕн Федераци Канашĕ унăн ыйтăвне тивĕçтернĕ, пулăшма йышăннă. 2014 çулхи мартăн 6-мĕшĕнче Крым Автономи Республикин Аслă Канашĕ Раççей субъекчĕсен йышне кĕме йышăннă. Çак тĕллевпе мартăн 16-мĕшĕнче Крым çурутравĕнче унăн статусĕ пирки референдум иртнĕ. Унта хутшăннисен 96,7 проценчĕ Раççейпе пĕрлешесшĕн пулнине пĕлтернĕ. Референдум пĕтĕмлетĕвĕсем тăрăх никама пăхăнман Крым Республики йĕркеленнĕ, Раççей йышне кĕме унпа мирлĕ килĕшÿ тунă.
Унтанпа 2 çул иртрĕ. Çак вăхăтра Крым Республикинче нумай пулăм ырă енне улшăнчĕ. Хальхи вăхăтра Крымра 2,5 пин ытла чăваш пурăнать.
Крым Раççейпе çĕнĕрен пĕрлешнĕренпе 2 çул çитнине çĕршывĕпе анлă паллă тăваççĕ: митингсем, тĕрлĕ мероприяти, тĕлпулусем иртеççĕ. Пысăк пулăма - Крым Раççейпе çĕнĕрен пĕрлешнĕ куна республикăра та уявлаççĕ. Мартăн 18-мĕшĕнче Шупашкарта - Хĕрлĕ лапамра 17 сехетре «Эпир - пĕрле!» митинг-концерт иртет. Митинг пуçаруçисем -ветерансен, профсоюз, çамрăксен, хĕрарăмсен организацийĕсен ертÿçисем, культура деятелĕсем, ăсчахсем, тăван çĕршыв çирĕплĕхĕшĕн чун-чĕререн çунакан граждансем.