16 марта 2016 г.
Патшалăх ача амăшĕсене тĕрлĕ енлĕ пулăшать. Вĕсенчен чи витĕмли - ача амăшĕн /çемье/ капиталĕ.
Федерацин çак программине 2007 çулта пурнăçа кĕртме пуçланă. Çак тапхăрта районти 1119 çемье ача амăшĕн /çемье/ капиталĕн сертификатне илнĕ. Чылайăшĕ асăннă укçа-тенкĕпе усă курнă: 673 çемье пурăнмалли çурт-йĕр условийĕсене лайăхлатнă, 19-шĕ ачисем аслă вĕренÿ заведенийĕсенче пĕлÿ пухнăшăн е ачасене садикре воспитани панăшăн тÿленĕ. Федераци бюджетĕнчен районти ача амăшĕсем 228,9 миллион тенкĕлĕх пулăшу илнĕ.
Ача амăшĕн /çемье/ капиталĕн виçи 2007 çултанпа 80 процент ÿснĕ - унăн паянхи виçи 453 пин тенкĕпе танлашать.
Демографи кăтартăвĕсем лайăхланса пынине шута илсе ача амăшĕн /çемье/ капиталĕн федераци программине тата 2 çула тăсма саккун йышăннă - 2018 çулхи декабрĕн 31-мĕшĕччен 2 е ытларах ача çуратнă çемьесем пулăшăва илĕç. Халĕ ача амăшĕн /çемье/ капиталĕпе усă курмалли майсене те анлăлатнă - маларах асăннă мерăсемсĕр пуçне инвалид ачасен социаллă адаптацийĕ валли тĕрлĕ таварсем туянма, пулăшу илме май пур.
Экономикăри кăткăс ларура та патшалăх ача амăшĕсене манмасть - пурнăçри кулленхи нушасене тивĕçтерме ача амăшĕн /çемье/ капиталĕн пĕр пайĕпе - 20 пин тенкипе усă курма ирĕк панă. Çак майпа районти 310 çемье, пурĕ 6 миллион ытла тенкĕлĕх, усă курнă. Пенси фончĕн районти пайĕ 2015 çулхи декабрĕн 31-мĕшĕччен ача çуратнă амăшĕсене кăçалхи март уйăхĕн вĕçĕччен çак майпа усă курма сĕнет.
З.ЯКОВЛЕВА,
Раççей Пенси фончĕн Елчĕк районĕнчи пайĕн ертÿçи.