12 марта 2016 г.
Кивĕ Арланкассине Шупашкар районĕнчен качча килнĕ Оля кĕрнеклĕ упăшки - Валерий Тихонов çумĕнче пĕчĕк хĕрпĕрчи пек туйăнатчĕ.
Унтанпа 26 çул иртрĕ. Тихоновсем виçĕ ача çуратса ÿстерчĕç. Оксана, Саша, Людмила хăйсен çемйисемпе Шупашкарта пурăнаççĕ. Халĕ Оля асанне те, кукамай та. Вăр-вар та хитрескере, ачисен аслă аппăшĕ теме пулать - çамрăк тăрать.
Пурăннă çулĕсене аса илсе Оля хунямăшĕ - Ксени аппа пирки ăшшăн аса илет. Хăйĕн тăван хĕрĕ вырăнне хурса хисепленĕшĕн, ĕçе вĕрентнĕшĕн, ырă кăмăлĕшĕн вăл ăна тав тăвать. Ксени аппа пек хуняма, чăнах та, сайра пулать. Çавăнпах пулĕ хисеплесе унăн ятне панă Оксана мăнукĕсем нумай.
...Темиçе çул каялла Тихоновсен çемйине тепĕр Оксана хутшăнчĕ, Ольăпа Валери çĕнĕрен çамрăк аттепе анне пулса тăчĕç. Вĕсен Оксана ятлă кĕçĕн хĕрĕ халĕ 2-мĕш класра вĕренет, çурта илем кÿрет.
Оля Тихонова ĕçсĕр ларма хăнăхман: арлать, çыхать, тĕрлет, çынна та пулăшма тарават. Кÿршĕре пурăнакан 85 çулхи Мария Никоновăна та пăхса тăрать - ватă çынна апат-çимĕç хатĕрлеме, çуртне хутса ăшăтма пулăшать.
Хальхи вăхăтра ялта ĕç çук, кÿршĕ яла çÿреме ансат мар. Çитменнине Тихоновсем килте сăвакан 3 ĕне, пăрусем, ытти выльăх-чĕрлĕх нумай усраççĕ. Хĕрарăмшăн ĕçĕ çителĕклех.
Пултаруллă Оля Тихонова çын хушшинче яланах хисепре.
С.БАРИНОВА.