05 марта 2016 г.
Çапла хакларĕ «Колос» ялхуçалăх производство кооперативĕн ертÿçи Н.В. Зайцев мăйракаллă шултра выльăх ферминче пухăннă çамрăк хĕрарăмсем пирки ушкăнпа малашлăх ыйтусем пирки калаçнă хушăра.
Тĕрлĕ ĕçе çулталăкĕпех хутшăнакан Антонина Павлова вите-хуралтăсене тирпейлеме те, кирлĕ чухне ĕне сăвакан е пăру пăхакан тантăшĕсене ылмаштарма та /кану кунĕсенче е отпускра/ пĕр сăмахсăрах килĕшет. Правленире шут ĕçне пурнăçлакансем те сĕтел хушшинче е компьютерпа ĕçленипе кăна çырлахмаççĕ - пур çĕрте те активлăх кăтартаççĕ.
- Иртнĕ çулхи çанталăк пирĕншĕн меллех килмерĕ пулсан та чылай кăтартусем ыранхине шанса пурăнма хавхалантараççĕ, - тет Николай Васильевич пухăннисене Хĕрарăмсен кунĕ ячĕпе саламланă май. - Кивçен укçапа тунă çĕнĕ вите хакĕ татăлчĕ. Ĕнесен ăрачĕ çĕнелсе пырать. Çурхи акана ăнăçлă ирттерме те майсем çителĕклĕ.
Хуçалăх пĕлтĕр унчченхинчен чылай нумайрах - кашни ĕнерен 5137 килограмм сĕт сунă. Çакă 2014 çулхинчен 380 килограма яхăн ытларах. 95 пăру илсе ÿстернĕ. Вĕсем талăксерен 500-шер грамм ытла хушăннă. Пĕлтĕр сĕт сутни хăй кăна икĕ миллион тенке яхăн услам кÿнĕ.
Çакна асăнма та кăмăллă: хуçалăхра ĕçшĕн тÿлесси çултан-çул лайăхланать. Пĕлтĕр ĕçлекенсен уйăхри вăтам шалăвĕ 14000 тенке яхăн пулнă.
Анатолий ТИМОФЕЕВ.
Автор сăнÿкерчĕкĕнче: малти ретре - Ирина Боброва, Людмила Абрамова, Валентина Аверкиева, Раиса Алексеева, иккĕмĕш ретре - Ольга Михайлова, Светлана Волкова, Антонина Павлова тата Эльвира Ананьева.