05 марта 2016 г.
Раççейри Кино çулталăкне халалласа районта шкул ачисем хушшинче «Кинофильмсенчи юрăсем» фестиваль иртрĕ.
Чи малтанах искусствăна юратакансене район администрацийĕн пуçлăхĕ Николай Миллин саламларĕ. Вăл ЧР Патшалăх Канашĕн Председателĕн Юрий Поповăн ятĕнчен шкулсене Чăваш Республикинче çуралса ÿснĕ Совет Союзĕн, Раççей Федерацийĕн Паттăрĕсене, Мухтав орденĕн тулли кавалерĕсене халалланă открыткăсем, плакатсем, дисксем парнелерĕ.
Унтан хамăр çĕршывра кăларнă кинофильмсенчи юрăсене шăрантарчĕç сцена ăстисем. Юрлакансен йышĕ пысăк, кашни ÿсĕмрисем хăйсен пултарулăхне кăтартрĕç. «Ансамбль» номинацире Таяпа Энтринчи 5-8 классенче вĕренекенсем «Буратино» кинофильмри «Шепталка кукол» юрăпа мала тухрĕç. Иккĕмĕшпе виççĕмĕш вырăнсенче - Кивĕ Эйпеçри «Виктория» тата Çирĕклĕ Шăхалĕнчи «Юность» ансамбльсем. «Дуэт» номинацире Елчĕкри Виктория Евстафьевăпа Татьяна Петрова «Битва за Севастополь» кинофильмри «Кукушка» юрра питĕ янăравлă шăрантарчĕç. Елчĕкри искусство шкулĕнчи Алина Петровăпа Елизавета Николаева, Патреккелти Эльвира Доброхотовăпа Диана Левая виççĕмĕш вырăна пайларĕç. Елчĕкри искусство шкулĕнчи трио - Ксения Агеева, Изабелла Мартынова, Аня Кузьмина - иккĕмĕш вырăнта.
«Солист» номинацири юрăçсене виçĕ ушкăна пайласа хак пачĕç. 4-6 классенче вĕренекенсем хушшинче Елчĕкри искусство шкулĕнчи Денис Герасимов «Дети капитана Гранта» кинофильмри «Жил отважный капитан» юррине питĕ илемлĕ шăрантарчĕ. Елчĕкри искусство шкулĕнчи Ксения Агееван, Лаш Таяпари Мария Михееван, Тĕмерти Карина Кириллован, Курнавăшри Татьяна Мясникован пултарулăхĕ те пысăк. 7-8 классенчен Елчĕкри искусство шкулĕнчи Анна Кузьмина «Мы из джаза» кинофильмри «Старый рояль» юрăпа мала тухрĕ. Курнавăшри Ирина Светопольская, Аслă Таяпари Диана Адюкина, Хăвăлçырмари Алина Ефимова - иккĕмĕшпе виççĕмĕш вырăнсенче.
9-10 классенче вĕренекенсен йышĕнче те юрлама юратакансем сахаллăн мар. Ку ушкăнра Елчĕкри Виктория Евстафьева, Çĕнĕ Пăвари Анна Волкова, Курнавăшри Татьяна Курчина «Счастье – это», «Кавказская пленница», «Приключения Электроника» кинокартинăсенчи юрăсене чуна тыткăнламалла шăрантарчĕç.
Çĕнтерÿçĕсемпе призерсем район администрацийĕн вĕренÿ тата çамрăксен политикин пайĕн дипломĕсене тивĕçрĕç.
Ф.ЦЫГАНОВА.