17 февраля 2016 г.
Районти тĕп библиотекăра Совет Çарĕсене Афганистанран илсе тухнăранпа 27 çул çитнине халалласа йĕркеленĕ «Раççей ывăлĕсен чыслă паттăрлăхĕ» патриотла тĕлпулăвне çар тивĕçне пурнăçланă салтаксем йышлăн хутшăнчĕç.
Ăна воин-интернационалистсен районти канашĕн председателĕ П.Анисимов уçрĕ. Вăл канашăн иртнĕ çулхи ĕç-хĕлĕпе паллаштарчĕ, кăçалхи тĕллевсем çинче чарăнса тăчĕ.
Мероприятинче «Афганистан... Чĕре ыратăвĕ» выставкăпа паллашнă май ентешсем хăйсем ют çĕршывра утса тухнă салтак пурнăçне аса илчĕç, пуçĕсене хунă ентеш-паттăрсене куç умне кăларса тăратрĕç.
Пухăннисем умĕнче район администрацийĕн пуçлăхĕн тивĕçĕсене пурнăçлакан Л.Левый тухса калаçрĕ, «афганецсем» шкул ачисене патриотла воспитани панă çĕрте пысăк ĕç тунине палăртрĕ. С.Сидоров воин-интернационалистăн амăшĕ, Шăмалакра пурăнакан З.Кулакова пенсионерка, Афганистан çинчен çырнă сăввине вуларĕ, пурнăçран çамрăклах уйрăлса кайнă ывăлĕн юлташĕсене çирĕп сывлăх сунчĕ.
Ытти тухса калаçакансем те çар службине чыслăн пурнăçланине, Афганистан вăрçи историе кĕрсе юлнине палăртрĕç. Темле пулсан та ентешсен чыслă паттăрлăхне манмалла мар. Афганистан вăрçи çинчен вара ăна хăйсен куçĕсемпе курнă ĕнерхи салтаксем кăна каласа пама пултараççĕ.