17 февраля 2016 г.
Районти шкул ачисем кăçал та, иртнĕ çулсенчи пекех, Пĕтĕм Раççейри олимпиадăн регионти тапхăрĕнче пуян ăс-хакăллă, пысăк тавракурăмлă пулнине çирĕплетрĕç.
Районти 61 вĕренекен регионти олимпиадăна хутшăнма тивĕçрĕ. Район чысне пĕтĕмĕшле пĕлÿ паракан 8 учрежденири 9-11 классенче вĕренекенсем хÿтĕлерĕç. Регионти олимпиадăн кăтартăвĕсем тăрăх Елчĕк, Лаш Таяпа тата Çирĕклĕ Шăхаль шкулĕсенче вĕренекенсен пĕлÿ шайĕ лайăххине палăртрĕç. Елчĕкри Данил Кондратьев /11 кл/ физкультурăпа, Дмитрий Смирнов /10 кл/ нимĕç чĕлхипе çĕнтерÿçĕсем, Андрей Данилов /9 кл/ астрономипе тата физикăпа призер, Юлия Доброхотова /10 кл/ географипе призер, Сергей Петров /11 кл/, Виктория Филиппова технологипе призер, Лаш Таяпари Андрей Павлов /11 кл/ экологипе çĕнтерÿçĕ, биологипе призер, Анастасия Волкова /10 кл/ биологипе призер, Ольга Маркова /9 кл/ экологипе çĕнтерÿçĕ, Çирĕклĕ Шăхалĕнчи Дмитрий Волков /10 кл/ физкультурăпа призер пулса тăчĕç.
Çавăн пекех чăваш чĕлхипе тата тăван ен культурипе регионсем хушшинчи олимпиадăра та шкул ачисем начар мар тупăшрĕç. Елчĕкри Максим Шавкин /10 кл/, Курнавăшри Анастасия Круглова /9 кл/, Лариса Назарова /11 кл/ призлă вырăнсем çĕнсе илчĕç.
Вĕренекенсен ÿсĕмĕнче вĕсен учителĕсен тÿпи те пысăк. Лаш Таяпари И.Павлова, Елчĕкри Л.Шепинова, В.Тябукова, В.Демьянов, С.Долгов, И.Егорова, Н.Кушманова, Çирĕклĕ Шăхалĕнчи О.Осиповпа А.Карсаков, Курнавăшри В.Воронова педагогсем олимпиадăна ăста та маттур ачасене хатĕрленипе ырă ята тивĕçлĕ.
Пĕлÿ марафонĕ малалла тăсăлать. Регионти олимпиадăсен рейтингĕнче мала тухнă шкул ачисем Пĕтĕм Раççей шайĕнче тупăшаççĕ.
Çакă та паха: Елчĕк районĕ, яллă районсем хушшинче республикăри олимпиадăра кăçал та пĕрремĕш вырăн йышăнчĕ.
М.ЧЕРНОВА.