10 февраля 2016 г.
Раççейри - Кино, Чăваш Республикинчи Ĕç çыннин çулталăкне нарăс уйăхĕн 5-мĕшĕнче республикăра савăнăçлă лару-тăрура уçрĕç. Чăваш Патшалăх филармонийĕнче иртнĕ çак пысăк пĕлтерĕшлĕ уява Елчĕк районĕн делегацийĕ те хутшăнчĕ.
Пухăннисен умĕнче Чăваш Республикин Пуçлăхĕ Михаил Игнатьев тухса калаçрĕ. Регион Пуçлăхĕ хăйĕн шухăшне палăртса çапла каларĕ: «Аслă Раççей çĕршывне ĕмĕрсем тăршшĕпех пысăк вăй - çĕршыва юратни пĕрлештерсе тăрать. Пирĕн асаттесемпе мăн асаттесем Аттелĕхĕн Аслă вăрçин çулĕсен хаяр вут-çулăмĕ витĕр утса тухнă, хăйсен пурнăçĕсене шеллемесĕр пирĕн çутă та таса пуласлăхшăн кĕрешнĕ. Вăрçă хыççăнхи юхăннă çĕршыва ура çине тăратнă, халĕ вара тĕнчери çĕршывсем те Раççей мĕн тери хăватлă та пуян пулнине пĕлеççĕ. 2016 çула Раççейре - Кино, Чăваш Республикинче Ĕç çыннин çулталăкĕ тесе палăртни те ахальтен мар. Патшалăх историйĕнчи пысăк çитĕнÿсем шăпах чăн-чăн ĕç çыннин кашни кунхи паттăрлăхне пула килнĕ».
Михаил Игнатьев Совет тата Раççей чи лайăх кинофильмĕсенче çын шăпине малти вырăна хунине палăртрĕ. Малалла: «Паянхи пирĕн тĕп тĕллев - ачасене воспитани парассинче ĕçчен, пултаруллă çынсен тĕслĕхĕсемпе усă курасси, вĕсене мĕн пĕчĕкрен тăван çĕршыва юратма, ĕçчен пулма, ĕçчен çынна хисеплеме вĕрентсе çитĕнтересси», - терĕ.
Савăнăçлă лару-тăру ĕçне хутшăннисен умĕнче эпир пурте лайăх пĕлекен Раççей халăх артисчĕ Николай Бурляев кинорежиссер тухса калаçрĕ. Вăл Шупашкара Мускавпа Раççей Патриархĕ Кирилл пилленине, РФ культура министрĕ Владимир Мединский, Раççейри кинематографистсен Союзĕн председателĕ Никита Михалков тата ыттисен саламĕсене илсе килнине пĕлтерчĕ.
Михаил Бурляев: «Кино çулталăкне Ĕç çыннин çулталăкĕпе пĕрлештерни республика Правительствин тĕрĕс шухăшĕ», - терĕ. Вăл ĕç çынни кино ÿкерес ĕçре те питех те хаклă пулнине палăртрĕ. Çавăн пекех вăл ĕçлĕ тĕлпулура Чăваш Ен Пуçлăхĕпе ХХ ĕмĕрти паллă артиста, Етĕрне хулинче çуралнă Николай Мордвинова асăнса пурнăçламалли ĕçсем çинчен калаçса татăлнине пĕлтерчĕ.
Республика Пуçлăхĕ Михаил Игнатьев 2016 çулта Чăваш Енре Ĕç çыннин çулталăкне ирттерме йышăннине Чăваш Енри профсоюзсем те ырласа йышăннă. Çакăн пирки «Чувашрессовпроф» Чăваш Республикинчи профсоюз организацийĕсен пĕрлешĕвĕн председателĕ Анатолий Коршунов пĕлтерчĕ.
Май пулнипе усă курса ĕçре палăрнисене Чăваш Республикин патшалăх наградисемпе, Республика Пуçлăхĕн стипендине тивĕçлĕ пулнă тăрăшуллă çамрăксене свидетельствăсем парса чысларĕç, тивĕçлисене «Чувашрессовпроф» организацийĕн Хисеп грамотисене пачĕç, ĕç династийĕсене чысларĕç. Хисепе тивĕçнисенчен пĕри пирĕн районти Патреккел ялĕнчи Миллинсен ĕç династийĕ. «Прогресс» АХОра тĕп экономистра ĕçлекен Валентина Миллина палăртнă тăрăх, вĕсен династийĕн пĕтĕмĕшле ĕç стажĕ - 661 çул. Валентина Николаевна та ĕмĕрне юратнă ĕçре ирттерет. Çемьерен, чун ыйтнипе суйласа илнĕ профессирен хакли урăх мĕн пултăр?
Светлана АРХИПОВА.
Автор сăнÿкерчĕкăнче: савăнăçлă уява Елчĕк районĕнчен хутшăннă делегацин пĕр ушкăнĕ.