06 февраля 2016 г.
Çĕнĕ выставка уçăлнă
Елчĕкри историпе тăван тавралăх музейĕнче Елчĕк шкулĕнчи Ирина Егоровăпа Сергей Долгов учительсен алĕçĕсен куравĕ уçăлнă.
Технологи предметне вĕрентекенсем ачасене мĕн пĕчĕкрен алĕçне хăнăхтараççĕ, хăйсем те ылтăн алăллă. Ирина Вячеславовнăпа Сергей Витальевич вĕрентекен ачасем районти олимпиадăра палăраççĕ. Юлашки çулсенче С.Долгов вĕренекенĕсем технологипе республикăри олимпиадăра призлă вырăнсем йышăнаççĕ. «Хайлавлă тĕлĕнтермĕшсем» курава уçнă çĕре район администрацийĕн культура тата информаципе тивĕçтерекен пай ертÿçи А.Александрова, ăстасен ĕçне пысăк хак паракансем хутшăннă. Мероприятие чĕрĕлĕх кĕртсе «Шанăç» фольклор ушкăнĕ илемлĕ юрăсем шăрантарнă.
Иртнĕ çула пĕтĕмлетеççĕ
Ял тăрăхĕсенче граждансен пухăвĕсем иртеççĕ.
Аслă Пăла Тимеш ял тăрăхĕнчи кашни ялтах пухусем иртнĕ. Ял тăрăхĕн пуçлăхĕ А.Портнов администрацин иртнĕ çулхи ĕç-хĕлне пĕтĕмлетнĕ, кăçалхи тĕллевсене палăртнă. Кунтах район администрацийĕн, пушар службин ĕçченĕсен, полицин участокри уполномоченнăйĕн доклачĕсене, депутатсен шухăшĕсене итленĕ. Ял çыннисем пурте пĕрле канашласа ĕçлесен кăна пурнăç ырă енне улшăнассине палăртнă.
Юрă-ташă ăстисем 100 ытла
Районта «Хавхалану çăлкуçĕсем» смотр-конкурс хĕрсех пырать.
Курнавăшри культура çуртне халăх лăк тулли пухăннă. Юрра-ташша юратакансем, спектакльсене кăмăллакансем, çамрăксемпе шкул ачисем Ĕç çынни тата Кино çулталăкне халалланă уява тăрăшса хатĕрленнĕ. Уяв куракансене пысăк савăнăç парнеленĕ.
/Район администрацийĕн сайтĕнчен/.