20 января 2016 г.
Яманчÿрел клубĕнче Сурхури уявĕ иртрĕ. Унта халăх йышлă пуçтарăнчĕ.
«Сармантей» тата «Эткер» фольклор ушкăнне çÿрекенсем мăн асаттесемпе асаннесен вăхăтĕнчи йăла-йĕркене кăтартса пачĕç.
Малтанах ачасем урам тăрăх çÿресе, килрен-киле кĕрсе юрăсем юрласа, пулас мăшăр мĕн ятлине ыйтса пĕлчĕç. Сурхури ачисене кашни килтех кучченеçсем - йăвача, кукăль, шÿтернĕ пăрçа парса савăнтарчĕç. Каярах пурте Тарье аппа патне ларма кайрĕç. Кунта юмăç пăхрĕç, юрларĕç, ташларĕç. Юмăç пăхнă чухне чăх тырă пĕрчисем енне туртăнчĕ. Кăçал тырпул ăнса пуласса шантарчĕ вăл. Çавăн пекех ачасем кăçатă ывăтса мăшăр хăш тăрăхран пулнине пĕлчĕç. Çăлран шыв ăсса витрене çĕрĕсем те ячĕç. Ватăсем пил парса киремет йывăççи патне кучченеç хума та манмарăмăр.
Пулас ăрусем ĕлĕкхи йăла-йĕркене асра тытса пыраççĕ пулĕ тетпĕр.
Н.ОБОЖГЕЕВА.