01 января 2016 г.
Республикăра пурăнакансене тата унăн хăнисене Çĕнĕ çул тата Раштав уявĕсенче канма акăш-макăш чаплă проектсем кĕтеççĕ. Шупашкарта Çĕнĕ çул асамĕсен академийĕн, Çĕнĕ çул бульварĕн алăкĕсем уçăлнă та ĕнтĕ.
Кăçал Çĕнĕ çулхи кану кунĕсене уйрăмах республикăри районсенче хаваслă ирттерме пулать. «Чăваш Ен тăрăх - Умкăпа пĕрле» проектпа килĕшÿллĕн Çĕнĕ Шупашкар, Сĕнтĕрвăрри, Çĕрпÿ хулисемпе, Шупашкар тата Етĕрне районĕсенче тĕрлĕ уяв мероприятийĕсем йĕркелеççĕ. Пур хула-района çитсен флаер-маршрут çине пичет ларттармалла. Кам та кам маларах асăннă маршрутпа пур çĕре те çитме май тупать, çав çынна тĕп парнепе чыслаççĕ. Хаклă парне - 2016 çулта Лакрей вăрманне, «Чебоксары Арена» пăр керменне тата Шупашкар хулинчи театрсене çÿреме тÿлевсĕр абонемент. Ятарлă карттăна сайт çинчен пичетлесе кăлармалла та - çула тухмалла, кашни çĕрте пичет ларттармалла. Сĕнтĕрвăрринче январĕн 3-мĕшĕнче, Етĕрнере январĕн 4-мĕшĕнче, Шупашкар районĕнче январĕн 5-мĕшĕнче, Çĕнĕ Шупашкарта январĕн 6-мĕшĕнче, Çĕрпÿре январĕн 7-мĕшĕнче асра юлмалли мероприятисем йĕркелеççĕ.
Çемьепе канас, ачасене Çĕнĕ çул представленийĕсем кăтартас тесессĕн «Чăваш Енре канма вăхăт» /www.новый год21.рф/ порталта кирлĕ информаци çителĕклĕ.
Хавас кăмăл шыраса ют çĕршыва кайма та кирлĕ мар, пурнăç киленĕçĕсене хамăр республикăрах тупма майсем çителĕклĕ.