Публикации » Тепĕр хут пăхса тухнă

14 марта 2012 г.

"Дорсервис" ООО тĕп директорĕн В.Жестянкинăн Элекçей Тимеш çулне сарассипе çыхăннă ултавлă ĕçĕ пирки "Елчĕк ен" хаçатăн 156-157 номерĕсенче пĕлтернĕччĕ. Елчĕк район сучĕ Чăваш Республикин бюджетне пысăк тăкак кỹнĕ (4 329 000 тенкĕ) В.А.Жестянкина РФ УК 159 статйин 4 пайĕпе айăпласа пилĕк çуллăх тĕрĕслев вăхăтне палăртса пилĕк çула условнăй майпа айăплама йышăну кăларнăччĕ. Çапах та район прокуратурине çемçе наказани тивĕçтермен. Вăл суд йышăнăвĕпе килĕшмесĕр ăна пăрахăçлама ыйтса кассаци жалоби тăратнă. Чăваш Республикин Аслă сучĕ кассаци жалобине тивĕçтернĕ. Малтанхи приговора пăрахăçланăран Елчĕк район сучĕ Жестянкин ĕçне 2012 çулхи нарăс уйăхĕн 29-мĕшĕнче тепĕр хут пăхса тухнă. Айăпçăна РФ УК 159 статйин 4 пайĕпе айăпласа 2 çула ирĕк прависĕр хăварма йышăннă. Айăплав срокне В.Жестянкин пĕтĕмĕшле режимлă юсану колонинче ирттерĕ. Приговор саккунлă вăя кĕмен-ха.