22 февраля 2012 г.
Районти вĕренỹ учрежденийĕсенче çамрăк ăрăва патриотла воспитани парасси çине уйрăмах пысăк тимлĕх уйăраççĕ. Ачасене Тăван çĕр-шыва юратма, ăна чунпа, ĕçсемпе парăнма тата хаклама, ашшĕ-амăшне, ыттисене хисеплеме вĕрентес тĕллевпе педагогсем час-часах хăюлăх урокĕсем йĕркеленине ырламалла. Совет салтакĕсене Афган çĕрĕ çинчен илсе тухнăранпа 23 çул çитнине тата çывхарса пыракан Çĕр-шыв хỹтĕлевçин кунне халалласа паянхи кун районти шкулсенче, вулавăшсемпе культура çурчĕсенче патриотизм темипе тĕрлĕ мероприяти иртет. Таяпа Энтри шкулĕнче, сăмахран, кашни класрах хăюлăх урокĕсем иртнисĕр пуçне, 7-8-мĕш классенче вĕренекенсем "Вăрçăра хĕмленнĕ чунсем" ятпа хатĕрленĕ презентаципе паллашнă. Курнавăшри шкулта пĕлỹ илекенсем вулавăшра иртнĕ "Вăрçă пĕтнĕ хыççăн" асăну каçне пуçтарăннă.