28 января 2012 г.
Килти хушма хуçалăха аталантарас тĕллевпе патшалăхран уйăракан укçа-тенкĕпе Елчĕк ял тăрăхĕнче уйрăмах туллин усă курнине палăртнă. 2011 çулта ял тăрăхĕнчи уйрăм хушма хуçалăх тытакан 307 çын, урăхла каласан, кунта пурăнакансен 21,3 проценчĕ, çăмăллăхлă кредитпа усă курса хăйсен ĕçне малалла йĕркелесе яма май тупнă. Пысăк хуралтă-вите хăпартма, выльăх-чĕрлĕх, техника туянма сахал мар укçа-тенкĕ кирлĕ. Элекçей Тимеш ялĕнче пурăнакан, йышлă выльăх-чĕрлĕх усракан Михаил Никифоров вара лару-тăруран тухмалли лайăх мел шыраса тупнă. Вăл Раççей Перекет банкĕ урлă выльăх-чĕрлĕх ĕрчетме ятарласа уйăракан тĕллевлĕ кредитпа усă курнă, çапла майпа хăй ĕмĕтне пурнăçланă.