Публикации » Чăваш Ен правительствине И.Моторин ертсе пырĕ

24 декабря 2011 г.

Чăваш Республикин Министрсен Кабинетне Иван Моторин ертсе пырĕ. Çакăн çинчен республикăн Президенчĕ Михаил Игнатьев алă пуснă. Маларах И.Моторин кандидатурине Чăваш Республикин Патшалăх Канашĕн депутачĕсем ырланă. Иван Борисович Моторин 1973 çулхи кăрлач уйăхĕн 10-мĕшĕнче Казахстанри Усть-Каменогорск хулинче çуралнă, кунти 23-мĕш шкула пĕтернĕ. 1995 çулта И.Н.Ульянов ячĕллĕ Чăваш патшалăх университетне "экономист" специальноçĕпе пĕтернĕ хыççăн "Ким" ОООра экспедитор-бухгалтер тивĕçĕсене пурнăçланă. 1998 çулхи ака уйăхĕнчен пуçласа правительствăра тĕрлĕ должноçсенче ĕçлет. 2006 çулхи ака уйăхĕнчен - Чăваш Республикин экономика аталанăвĕпе суту-илỹ министрĕ, 2010 çулхи авăн уйăхĕн 17-мĕшĕнчен - ЧР Министрсен Кабинечĕн Председателĕн çумĕ - ЧР экономика аталанăвĕн, промышленность тата суту-илỹ министрĕ пулса ĕçленĕ.