17 декабря 2011 г.
Суйлавсем иртрĕç, çавăнпа "çĕнĕ" депутатсен ĕçе те пуçăнмалла, саккунсем йышăнассипе тăрăшмалла. Раштавăн 15-мĕшĕнче Чăваш Республикин пиллĕкмĕш суйлаври Патшалăх Канашĕн пĕрремĕш сессийĕ иртрĕ. Депутатсен корпусĕнче 44 çын, вĕсенчен 33-шĕ "Единая Россия" партирен, 4-шĕ _ коммунистсем, 5-шĕ "Справедливая Россия" партирен, 2-шĕ _ либерал-демократсем. Пухăва "Хлеб" АУОн генеральнăй директорĕ Е.Бадаева уçрĕ тата ертсе пычĕ. Чăваш Республикин Президенчĕ М.Игнатьев депутатсене саламларĕ, Патшалăх Канашĕпе Правительство пĕр-пĕринпе килĕштерсе ĕçлеме пултарнине палăртрĕ. Депутатсен 36 сассипе саккунсем йышăнакан республикăри органăн ертỹçине Ю.Попова суйларĕç. Вăл маларах "Вăрнарти аш-какай комбиначĕ" АУОн генеральнăй директорĕ пулса ĕçленĕ. "Эпĕ политикăри çĕнĕ çын, анчах Чăваш Ене чĕререн юрататăп. Республикăн тăнăçлăхĕшĕн ертỹçĕ кресли çинче уй-хирти пекех, çичĕ тар тухиччен ĕçлеме хатĕр", _ пĕлтерчĕ Юрий Алексеевич. Чăваш Енĕн Патшалăх Канашĕн комитечĕсен ертỹçисене çак депутатсене суйланă: патшалăх тата вырăнти хăй тытăмлăх строительстви, депутатсен этикипе регламенчĕ енĕпе _ Н.Малов, бюджет, финанс тата налуксем енĕпе _ А.Князев, экономика политики, агропромышленноç комплексĕпе экологи енĕпе _ О.Мешков, социаллă политика тата наци ыйтăвĕсем енĕпе _ П.Краснов. Чăваш Республикин Патшалăх Канашĕн Председателĕн çумĕсем пулма А.Князевпа О.Мешкова, аппарат ертỹçи пулма А.Ухтиярова суйланă.