26 ноября 2011 г.
Шыв - çĕр çинче чи тĕлĕнмелле япала тесен те йăнăшмастпăр. Вăл кăна хытă, чĕрĕ, шĕвĕ, газ евĕрлĕ пулать, унсăр пурнăç чарăнса тăрĕ. Пире çăвăнма та, ĕçме те, апат-çимĕç пĕçерме те, сывлăха çирĕплетме те кирлĕ вăл. Ахальтен мар пĕр юрăра: "Шывсăр эпир унталла та мар, кунталла та мар..." тесе юрлаççĕ пулĕ. Шыв пире сывлăш пекех кирлĕ. Çăл куç сассине итлеме пĕтĕм çын, пĕтĕм йывăç-тĕм кăмăл тăвать, тейĕн. Пăхсам тавраналла: шыв çийĕн çирĕк те, пилеш-хурама та усăннă. Чашлама вăй-хăват, нỹрĕк парса тăрать вĕсене. Пĕр кĕвĕллĕн, шăкăр-шăкăр юхакан таса мерчен сипечĕ кама кăна илĕртмест.