01 октября 2011 г.
Кăçал ял хуçалăх производство кооперативĕсенче тырă-пулă, пахча çимĕç ăнса пулчĕ. Анчах вĕсене хуласенчи элеваторсене, тавар туянакансем патне илсе çитересси транспорт тата ытти тăкаксемпе çыхăннă. Çав вăхăтрах тыр-пул, пахча çимĕç, çĕр улми, аш-какай туянас кăмăллисем хамăр патăмăртах йышлă. Çакна шута илсе юлашки вăхăтра хăш-пĕр хуçалăхсем хăйсем туса илнĕ ял хуçалăх продукчĕсене Елчĕкри пасара илсе тухса сутни усăллине туйса илчĕç. Иртнĕ пасарта, акă, икĕ хуçалăх тыр-пула унта самантрах сутса пĕтернĕ. Паянхи пасара "Сатурн", "Комбайн", "Кушкă" ял хуçалăх производство кооперативĕсем тырă, аш-какай, пахча çимĕç сутма илсе тухаççĕ. Çитес шăмат кун, юпа уйăхĕн 8-мĕшĕнче, "Эмметево" ООО, "Знамя" ООО - аш-какай, тырă, "Агропродсер-ис" ООО, А.Цапырин ХФХ - тырă илсе тухма шутлаççĕ. Юпа уйăхĕн 15-мĕшĕнче -"Труд", "Свобода", "Колос" ЯХПКсем, Ю.Галкин ХФХ, юпа уйăхĕн 22-мĕшĕнче - "Прогресс" АХО, "Родник" ООО, "Яманчурино" ООО, В.Галкина ХФХ, юпа уйăхĕн 29-мĕшĕнче - "Аранчеево" ООО, "Нива" ООО, "Урожай" ООО, "Рассвет" ЯХПК, Н.Гладков ХФХ пасара ял хуçалăх продукчĕсем илсе тухаççĕ. Чỹк уйăхĕнче те районти ял хуçалăх предприятийĕсем пасара ял хуçалăх продукчĕсем илсе тухмалли графика çирĕплетнĕ. Ял тăрăхĕсенчи пасарсенче те суту-илỹ йĕркелесен аван пулĕччĕ. Эпир хамăр хаçатра хуçалăхсем пасарта ял хуçалăх таварĕсемпе мĕнле суту-илỹ тунине, вĕсене мĕн хакпа сутнине çутатсах тăрăпăр.